У кантрабандыстаў у Закарпацці канфіскавалі беларускія цыгарэты

У Чарнігаўскай вобласці на мяжы з Беларуссю ёсць «вокны» для кантрабандыстаў.

Пра гэта на сваім афіцыйным сайце напісаў губернатар Закарпацкай вобласці Генадзь Маскаль, паведамляе УНИАН.

«Вынікі ператрусаў абагульняюцца і будуць паведамленыя дадаткова, аднак ужо можна сказаць, што асноўным пастаўшчыком цыгарэт, якія затым нелегальна перапраўляліся за мяжу, была Львоўская тытунёвая фабрыка», - гаворыцца ў яго паведамленні.

Частка канфіскаваных цыгарэт - беларускія, і гэта паказвае на той факт, што ў Чарнігаўскай вобласці на мяжы з Беларуссю маюцца «вокны» для кантрабандыстаў, мяркуе Маскаль.

Ён дадаў, што для ўзмацнення барацьбы з кантрабандай праз зялёную мяжу ўздоўж Закарпацця на ўсіх чатырох перавалах, што вядуць у вобласць, выстаўленыя пасты з супрацоўнікаў мытні, памежнай службы, МУС, СБУ і фіскальнай службы.

«Пасты не будуць дапускаць завозу ў Закарпацце буйнааптовых партый цыгарэт (у тым ліку без акцызных марак) і кантрафактных спіртных напояў, а з Закарпацця - вывазу лесу-кругляка», - паведаміў кіраўнік вобласці.

Менавіта кантрабанда лічыцца асноўнай прычынай канфлікту ў Мукачава паміж «Правым сектарам» і атачэннем дэпутата Вярхоўнай Рады Міхаіла Ланьё. Паводле версіі прадстаўнікоў «ПС», дэпутат Ланьё сам выклікаў іх на перамовы, бо «Правы сектар» пачаў перашкаджаць патоку кантрабанды.

Нагадаем, у Мукачове днём у суботу, 11 ліпеня, адбылася страляніна, у выніку якой ёсць параненыя і загінулыя.