Служба бяспекі Славаччыны: У краінах Еўропы і NATO актывізавалася расейская выведка

Галоўная спецслужба Славаччыны ў штогадовым дакладзе паведаміла аб актывізацыі расейскіх выведнікаў у краінах Еўропы і NATO.

Пра гэта гаворыцца ў дакладзе, апублікаваным на сайце Славацкай інфармацыйнай службы, вядомай таксама як Служба бяспекі Славаччыны, піша РБК.

«У сувязі з ростам напружанасці ў стасунках паміж Расейскай Федэрацыяй і заходнімі дзяржавамі праз канфлікт ва Украіне значна актывізавалася дзейнасць расейскіх выведных службаў ва ўсіх краінах NATO і ЕЗ, у тым ліку ў Славаччыне», - гаворыцца ў дакладзе.

У дакладзе адзначаецца, што некалькі замежных выведак спрабавалі патрапіць у цэнтральныя дзяржаўныя органы ўлады, сілы бяспекі. Акрамя таго, замежныя спецслужбы спрабуюць паўплываць на грамадскае меркаванне ў еўрапейскіх краінах. Славацкая контрвыведка таксама паведаміла аб павышанай цікавасці замежных спецслужбаў у эканамічнай, навуковай і вайсковай сфэрах, а таксама ў галіне прамысловага шпіянажу.

У канцы красавіка пра высокі ўзровень актыўнасці на тэрыторыі краіны выведных спецслужбаў Расеі паведамілі спецслужбы Польшчы. У дакладзе Агенцтва ўнутранай бяспекі (ABW) краіны гаварылася, што ў 2014 годзе польскія контрвыведнікі затрымалі грамадзяніна Польшчы расейскай нацыянальнасці паводле падазрэнні ў супрацоўніцтве з Галоўнай выведным кіраўніцтвам (ГРУ) Генштаба УС Расеі. Яшчэ двое расейскіх дыпламатаў былі абвешчаныя персонамі нон грата праз абвінавачванні ў вядзенні дзейнасці, неспалучальнай з дыпламатычным статусам.

У дакладзе таксама сцвярджалася, што важным элементам расейскай дзейнасці было стварэнне супярэчнасцяў паміж ЕЗ і NATO.

Увосень 2014 года ўлады Чэхіі паведамілі пра надзвычай высокую канцэнтрацыю агентаў расейскай выведкі ў краіне. Пры гэтым шэрагі агентаў, на іх думку, папаўняюцца расейцамі, якія прыязджаюць у Чэхію паасобку пад выглядам турыстаў, экспэртаў, навукоўцаў і бізнэсоўцаў.