Галкіпер берасцейскага «Дынама»: Каліноўскі - наш нацыянальны герой

Галкіпер берасцейскага «Дынама» Зміцер Дудар назваў чалавека, якога ўважае нацыянальным героем Беларусі.

Пра гэта спартовец заявіў «Прессболу».

- Ты казаў, што твой любімы выканаўца - Ягор Летаў, любімы пісьменнік - Васіль Быкаў, гістарычная асоба - Кастусь Каліноўскі. Уражвае дыяпазон інтарэсаў. Адкуль гэтакі пахвальны густ і шырокі кругагляд?

- Я ж родам з Горадні. А горад у нас высокакультурны, працяты беларускай аўрай. Акрамя таго, я вучыўся ў гімназіі. І калі б не патрапіў у юнацкую зборную, напэўна з галавой пагрузіўся б у вучобу і звязаў будучыню з юрыдычнай дзейнасцю. Задаткі меліся, пастаянна ўдзельнічаў у розных алімпіядах.

Калі быў у дублі менскага «Дынама», паступіў на юрфак БДУ і паўтара года правучыўся нават на дзённым аддзяленні. А людзі, якіх пералічыў у анкеце ... Для мяне гэта - глыбы. Часта слухаю Летава, Цоя, граю іх музыку на гітары. Каліноўскі - наш нацыянальны герой. Быкаў - культавы пісьменнік вялізнага маштабу, з грамадзянскай пазіцыяй. На жаль, у Беларусі мала пра гэта кажуць. Нацыянальная культура і самасвядомасць у заняпадзе. Гэта ненармальна, - сказаў Дудар.