Беларусы кормяць расейцаў нарвежскай рыбай
7- 8.07.2015, 14:08
- 9,268
Пуцінскае эмбарга дапамагло Беларусі стаць найбуйнейшым імпарцёрам рыбы з Нарвегіі.
Нягледзячы на харчовае эмбарга, уведзенае Уладзімірам Пуціным у жніўні мінулага года, Нарвегія прадала за мяжу рэкордную колькасць рыбы. Як паведамляе Нарвежскі камітэт экспарту рыбы, у першай палове 2015 гэтая краіна паставіла замежным пакупнікам рыбы на 34 млрд крон (4,3 млрд даляраў), што на 5% (1,5 млрд крон) больш, чым у студзені-чэрвені мінулага года, піша «Заўтра тваёй краіны».
Характэрна, што ў 2012 і 2013 гадах найбуйнейшым пакупніком нарвежскай рыбы была Расея. Але з жніўня 2014-га дзейнічае забарона на ўвоз рыбы ў РФ з Нарвегіі.
Аднак, нарвежцы знайшлі альтэрнатыву расейскаму рынку. Сярод пакупнікоў, якія павялічылі імпарт рыбы, Беларусь, Вялікая Брытанія, Егіпет, Нігерыя, Польшча.
Прынамсі, наша краіна разам з Польшчай стала найбуйнейшым у першым паўгоддзі пакупніком нарвежскай стронгі. Беларусь разам з Нямеччынай, Польшчай і Літвой таксама ўвайшла ў лік галоўных імпарцёраў замарожанага філе нарвежскага селядца.
У немалой ступені гэтаму спрыяла пуцінскае прадуктовае эмбарга, бо яно першапачаткова не распаўсюджваецца на перапрацаваную рыбу. Беларускія кампаніі перапрацоўваюць нарвежскую рыбу, а затым увозяць на расейскі рынак.
«Заўтра тваёй краіны» на падставе звестак Дэпартамента ветэрынарнага і харчовага нагляду Міністэрства сельскай гаспадаркі і харчавання Беларусі склаў рэйтынг найбуйнейшых імпарцёраў нарвежскай рыбы ў першым паўгоддзі 2015 года.
Улічваліся толькі партыі, якія паводле звестак дэпартамента, ужо прайшлі на тэрыторыю Беларусі.
Характэрна, што адна з самых буйных перапрацоўчых кампаній СНД - «Санта Брэмар» завезла з Нарвегіі ўсяго 38 тон рыбы.
Топ-5 найбуйнейшых імпарцёраў рыбы з Нарвегіі ў першым паўгоддзі 2015
У чэрвені 2015 Уладзімір Пуцін падоўжыў прадуктовае эмбарга супраць харчовых тавараў з ЗША, ЕЗ, Канады, Нарвегіі і іншых краін яшчэ на год. Такім чынам, Беларусь атрымлівае магчымасць нарасціць экспарт нарвежскай рыбы, і зарабіць на продажы рыбнай прадукцыі ў Расею.