Жыхары Салігорска пратэстуюць супраць «ушчыльнення»

У Салігорску працягваюцца пратэсты супраць ушчыльнення гарадской забудовы ля вуліцы Горкага.

Чарговую сустрэчу з грамадзянамі аб гэтай праблеме былі вымушаныя правесці мясцовыя чыноўнікі на чале са старшынём райвыканкама, піша сайт ПЦ "Вясна".

Прысутны на сходзе грамадскі актывіст Уладзімір Шыла пракаментаваў яго вынікі наступным чынам:

- Пазіцыя улад, пра што неаднаразова паўтараў спадар Рымашэўскі, зводзілася да аповедаў пра тое, што ў нас адзін з найлепшых гарадоў свету з выдатным упарадкаваннем, дзе ўсё квітнее. Але ёсць адна праблема. Ёсць такі Шыла, які нават не жыве ў горадзе, але падбухторвае людзей і перашкаджае выкананню дзяржаўнай праграмы забеспячэння насельніцтва квадратнымі метрамі. Кіраўнік выканкама не быў настроены на канструктыўную размову аб існасці пытання і займаўся нейкімі кпінамі і абразамі. Але людзі сабраліся жа абмяркоўваць не маю персону і нават не месца Салігорска ў сусветным рэйтынгу гарадоў.

Падчас сходу жыхары мікрараёна адназначна заявілі чыноўнікам, што дзевяціпавярховікам на вуліцы Горкага зусім не месца. Але чыноўнікі дыскутаваць аб гэтай праблеме фактычна адмовіліся і заняліся прафанацыяй, адказваючы даслоўна на кожнае пытанне грамадзян абяцаннем даць адказ у пісьмовай форме.

- Улады заявілі, што дом там усё роўна пабудуюць, але не будзе гэтага, - кажуць жыхары горада. - Яны ўшчыльняюць, ушчыльняюць, але ў чалавечага трывання ёсць нейкая мяжа. Людзі трывалі, калі будавалі шматпавярховікі на тэрыторыі 8-й школы, на 11-й школе, але ў гэтыя школы рэальна такі дом проста не лезе.

Найбольш жа абураюць маніпуляцыі ўлад з подпісамі грамадзян за і супраць будаўніцтва дома. Ужо пасля заканчэння грамадскіх слуханняў улады назбіралі ва ўсім месце дзве сотні левых подпісаў нібыта ў сваю падтрымку, хоць першапачаткова імі была агучаная колькасць дзевяць чалавек. Раней улады займаліся фальсіфікацыяй выбараў, потым заняліся фальсіфікацыяй эканомікі, а цяпер дакаціліся да фальсіфікацыі грамадскіх слуханняў. Гэта катастрофа. Але менавіта таму яны дом там не пабудуюць, бо чыноўнікі апусціліся ўжо на самае маральнае дно.

Спыняць ушчыльненне ў Салігорску мясцовыя актывісты абяцаюць усімі магчымымі формамі мірнага пратэсту.