Украінцаў прымусяць плаціць за збор ягад на беларускай мяжы

Беларускія памежнікі папярэджваюць украінцаў, што за збор ягад цяпер давядзецца плаціць мыту.

Наведванне заказніка «Альманскія балоты» з 25 жніўня для замежнікаў стала платным, піша «Украінская праўда».

Сума аплаты за наведванне заказніка «Альманськія балоты» для замежных грамадзян і асоб без грамадзянства, якія часова знаходзяцца і часова пражываюць у Беларусі, у 2015 годзе складае сем базавых адзінак (1 базавая адзінка складае 180 тысяч рублёў, ці 227 грыўняў), у 2016 - дзесяць базавых адзінак.

Тыя ж грамадзяне, якія праігнаруюць аплату за наведванне заказніка і наважацца перасякаць дзяржаўную мяжу незаконна, у абыход пункта перасячэння дзяржмяжы, будуць прыцягвацца да адміністрацыйнай адказнасці.

Новыя ўмовы наведвання заказніка для збору дзікаросаў на беларускай тэрыторыі тычацца жыхароў 10 памежных вёсак Украіны, якія маюць права перасякаць дзяржаўную мяжу ў спецыяльных пунктах паблізу н.п. Драздынь, Хінічава і Забалаць.

Пры перасячэнні дзяржмяжы грамадзяне Украіны, акрамя пашпарта і пропуску ў памежную паласу павінны паказаць супрацоўнікам органаў памежнай службы квітанцыю аб аплаце дзяржаўнай мыты за наведванне заказніка.

Штраф за парушэнне дзяржаўнай мяжы ўстаноўлены Кодэксам аб адміністрацыйных парушэннях Рэспублікі Беларусь і складае суму роўную ад 10 да 100 базавых адзінак.

Парушэнне дзяржаўнай мяжы на працягу года, зробленае паўторна, пагражае прыцягненнем вінаватага да крымінальнай адказнасці.

У парушальнікаў будзе канфіскоўвацца пропуск у памежную паласу, што пазбаўляе іх права праходзіць афармленне праз мяжу ў сезонных месцах перасячэння мяжы тэрмінам на адзін год.

Наяўнасць аплаты за наведванне заказніка ў замежных грамадзян і асоб без грамадзянства, якія часова знаходзяцца і часова пражываюць у Беларусі, падчас рэйдаў будуць кантраляваць работнікі Столінскай раённай інспекцыі прыродных рэсурсаў і аховы навакольнага асяроддзя, заказнікаў "Сярэдняя Прыпяць" і "Альманскія балоты" Палескага і Столінскага лясгасаў.