Вугоршчына ўвядзе надзвычайнае становішча праз мігрантаў

Вугоршчына плануе з 15 верасня ўвесці надзвычайнае становішча ў краіне праз крызіс з наплывам уцекачоў.

Пра гэта заявіў кіраўнік апарата прэм'ер-міністра краіны Янаш Лазар са спасылкай на прапанову міністра ўнутраных спраў Шандора Пінтэра, піша РБК-Украіна са спасылкай на Reuters.

Вугорскія ўлады таксама маюць намер на месяц раней тэрміну - да пачатку кастрычніка - закончыць будаўніцтва загароды ад нелегальных мігрантаў на мяжы з Сербіяй.

"Гэтай агароджы вышынёй 3,5-4 м будзе дастаткова для таго, каб абараніць краіну. Асабліва, калі з другога боку ўздоўж яго будуць несці патрульную службу паліцэйскія", - адзначыў Лазар.

Даўжыня муру на мяжы з Сербіяй складзе 175 кіламетраў. Раней меркавалася, што будаўніцтва павінна закончыцца да 31 кастрычніка.

Як і іншыя еўрапейскія краіны, Вугоршчына сутыкнулася з найцяжэйшым наплывам уцекачоў, 25 жніўня ў краіне зафіксавалі рэкордную колькасць мігрантаў - 2,5 тысячы чалавек, а агулам мяжу Вугоршчыны ў гэтым месяцы перасеклі 34 тысячы чалавек. На наступны дзень вугорская паліцыя ўжыла слёзацечны газ супраць мігрантаў на мяжы.

Уцекачы прыбываюць у Вугоршчыну з мэтай трапіць у краіны Заходняй Еўропы, у першую чаргу, ў Нямеччыну і Аўстрыю. У сувязі з гэтым прэм'ер Вугоршчыны Віктар Орбан заклікаў Бэрлін і Вену закрыць межы для мігрантаў. На думку Орбана, абедзве дзяржавы павінны "выразна сказаць", што яны не стануць больш прымаць уцекачоў, інакш у Еўропу будуць і далей прыязджаць "мільёны людзей".

13 ліпеня ў Вугоршчыне афіцыйна пачалося будаўніцтва 4-метровага муру на мяжы з Сербіяй з мэтай спыніць прыток мігрантаў, якія спрабуюць трапіць у Еўразвяз праз паўднёвую мяжу краіны. З крытыкай законапраекта выступілі ААН, Еўракамісія і Рада Еўропы, якія сцвярджаюць, што гэтая ініцыятыва ставіць пад пагрозу абарону ўцекачоў.