The New York Times: У Трампа амаль мільярд даляраў страт

Праз велізарныя страты Дональд Трамп 18 гадоў мог не плаціць падаткі ў бюджэт ЗША.

Падатковыя дакументы Дональда Трампа дазваляюць выказаць здагадку, што кандыдат у прэзідэнты ЗША праз велізарныя страты на пачатку 1990-х гадоў мог атрымаць значныя падатковыя льготы на тэрмін да 18 гадоў, піша The New York Times (пераклад - РБК).

Газета сцвярджае, што атрымала доступ да раней не апублікаваных дакументаў аб падатковых адлічэннях мільярдэра. З іх вынікае, што Дональд Трамп у 1995 годзе даў справаздачу аб стратах сумаю $916 млн даляраў, у выніку чаго ён мог легальна атрымаць права значна знізіць свае падатковыя выплаты цягам наступных 18 гадоў. Выданне не ўдакладняе, ці скарыстаўся Трамп гэтай магчымасцю.

Паводле інфармацыі выдання, страты, якія сталі падставай для атрымання падатковых ільгот, адбыліся праз памылкі ў кіраванні трыма казіно ў горадзе Атлантыка-Сіці, няўдалай спробы Трампа заняцца бізнэсам у сферы авіяперавозак, а таксама праз набыццё ім гатэля Plaza на Манхэтэне.

Экспэрты ў падатках, якіх выданне наняло для аналізу гэтай інфармацыі, растлумачылі, што пасля страт Трамп паводле закона мог атрымаць льготы. Яны дазвалялі яму цягам 18 гадоў памяншаць падаткаабкладаемы прыбытак на суму атрыманых страт.

Заканадаўства не патрабуе, каб кандыдат у прэзідэнты ў абавязковым парадку публікаваў свае падатковыя дэкларацыі. Аднак паводле традыцыі ўдзельнікі прэзідэнцкай гонкі звычайна рабілі гэта. Трамп, уступіўшы ў барацьбу за Белы дом, адмовіўся апублікаваць свае падатковыя справаздачы.

Прадстаўнік кампаніі Хілары Клінтан Робі Мук назваў артыкул «бомбай» і заявіў, што ён сведчыць пра каласальныя няўдачы ў бізнэсе рэспубліканца. «Гэты даклад як бомба, якая паказвае каласальны характар мінулых няўдач у бізнэсе Дональда Трампа і як доўга ён можа пазбягаць выплаты якіх-небудзь федэральных падаходных падаткаў наогул», - сказаў Мук. Ён таксама адзначыў, што цяпер, калі ўсё ўжо стала вядома, чаму б Трампу «не пайсці далей і не апублікаваць свае справаздачныя звесткі, каб паказаць нам, наколькі ён «разумны», - сказаў Мук.

У штабе Трампа заявілі, што «меркаваныя» падатковыя дакументы атрыманы нелегальным шляхам. Іх публікацыя з'яўляецца пацвярджэннем таго, што істэблішмэнт і СМІ, што іх падтрымліваюць, агулам дзейнічаюць у інтарэсах Клінтан і Дэмакратычнай партыі. Трамп у заяве названы высокакваліфікаваным бізнэсоўцам, які заплаціў сотні мільёнаў даляраў падаткаў.

24 верасня ў рэдакцыйным артыкуле The New York Times афіцыйна абвясціла, што падтрымлівае ў барацьбе за пасаду прэзідэнта Хілары Клінтан.

«У любы звычайны год выбараў мы б параўналі двух кандыдатаў у прэзідэнты бок аб бок па шэрагу пытанняў. Але гэты год выбараў не з'яўляецца звычайным. Такое параўнанне было б пустой тратай часу ў гонцы, дзе адзін з кандыдатаў - наш выбар, Хілары Клінтан, мае стаж працы і шэраг прагматычных ідэй, а другі, Дональд Трамп, хавае інфармацыю пра сябе і свае планы, у той жа час абяцаючы дастаць месяц і зоркі», - гаварылася ў артыкуле.