АЗС пад Стоўбцамі папрасіла прабачэння за расейскую мову

Актывісту Глебу Лабадзенка прыйшоў ліст за подпісам кіраўніка кампаніі United Company Міхаіла Юркавіча.

Пра гэта паведамляе «Наша Ніва», якая і апублікавала поўны тэкст ліста.

«Добры дзень, паважаны Глеб Паўлавіч!

Ад імя кампаніі СТАА «Юнайтэд Компані», хочам папрасіць прабачэння за дасланы супрацоўнікам нашай кампаніі Кулаком В.У. адказ на расейскай мове на Вашу заўвагу ў кнізе водгукаў і прапаноў ад 2016/08/21, напісаную на беларускай мове. Мы правялі тлумачальную працу з кіраўнікамі сярэдняга звяна і прымем адпаведныя меры для выканання заканадаўства ў дачыненні да патрабаванняў пісьмовых адказаў на пісьмовыя звароты грамадзян для прадухілення аналагічных выпадкаў у будучыні».

Нагадаем, што ў Глеба Лабадзенкі былі дзве прэтэнзіі да кампаніі.

Першая тычылася таго, што на АЗС пад слупкамі не захацелі перамыкаць канал «Расея 24». Пазней Міністэрства інфармацыі патлумачыла, што згодна з заканадаўствам у грамадскім месцы можна трансляваць толькі дзевяць каналаў так званага «сацыяльнага пакета»: «Беларусь 1», «Беларусь 2», «Беларусь 3» і г.д. Канал «Расея 24» няма не толькі сярод гэтых дзевяці, але і сярод 209 замежных каналаў, дазволеных для трансляцыі ў Беларусі. Суд па гэтай справе павінен быў адбыцца 28 верасня, але яго перанеслі, бо напярэдадні пратакол адправілі на дапрацоўку.

Другая прэтэнзія ішла з першай. Пасля таго, як Глеб на беларускай мове ў кнізе скаргаў і прапаноў апісаў сітуацыю з нежаданнем супрацоўнікаў запраўкі пераключыць канал «Расея 24», яму прыйшоў адказ па-руску. Гэта з'яўляецца парушэннем заканадаўства, за што пагражае штраф ад 4 да 20 базавых велічынь.

Паралельна актывісту прыйшоў адказ з Генеральнай пракуратуры, што гэта справа перададзена на разгляд у пракуратуру Менскай вобласці.