Фядыніч: Утрыманне беспрацоўных трэба ўскласці на тых, хто разваліў эканоміку

Улады хочуць запісаць у дармаеды як мага больш беларусаў.

Згодна з новай рэдакцыі закона аб занятасці насельніцтва, якая ўваходзіць у дзеянне з 24 кастрычніка, беларусаў будуць матываваць самастойна займацца пошукам працы.

У кожнага беспрацоўнага з'явяцца абавязкі - напрыклад, ён будзе павінен цягам двух працоўных дзён з дня выдачы накіравання прыходзіць на перамовы з патэнцыйным наймальнікам. Больш за тое, будзе паменшаны максімальны перыяд, цягам якога можна знаходзіцца на ўліку ў якасці беспрацоўных - з 36 да 18 месяцаў.

Хутчэй за ўсё, такія захады зрэжуць і без таго невялікую колькасць тых людзей, якія маюць афіцыйнае права ўважацца за беспрацоўных, піша «Салідарнасць».

- Гэта паказвае слабасць уладаў і эканомікі, - пракаментаваў сітуацыю старшыня Беларускага прафзвязу работнікаў радыёэлектроннай прамысловасці Генадзь Фядыніч. - Яны хочуць зрэзаць аб'ём выплат беспрацоўным і таму ўціскаць тэрміны, маўляў, хутчэй шукай працу. Гэта значыць, чыноўнікі зноў наступаюць на тыя ж граблі - развязваюць свае праблемы за кошт людзей. Я мяркую, што гэта проста непавага да свайго народу.

Са словаў прафсаюзнага лідара, для многіх беларусаў, якія па дзейнаму заканадаўству ўважаюцца за «дармаедаў», ужо прыходзяць «лісты шчасця».

- Мы бачым гэта па колькасці зваротаў людзей, - падкрэсліў ён. - Выклікаюць людзей нават з іншых гарадоў, каб яны прыехалі па месцы рэгістрацыі і аплацілі гэты падатак. Ідзе тупое выкананне гэтага дэкрэта «аб дармаедстве», бо сродкі, якія будуць ад яго атрыманыя ў выглядзе штрафаў, застануцца ў мясцовым бюджэце. А з улікам таго, што мясцовыя бюджэты на ладан дыхаюць, то яны паспрабуюць ускубнуць людзей яшчэ больш.

Тым не менш Генадзь Фядыніч заўважыў, што далёка не ўсе грамадзяне пагаджаюцца добраахвотна аплаціць гэты штраф.

- Частка людзей адчуваюць страх і наважваюцца пайсці заплаціць - такія людзі ёсць, але гэта невялікая група. Іншая частка людзей, таксама малалікая, гатовая змагацца да канца аж да міжнародных судоў. А большасць народа ў нас, як той казаў, «і ні туды, і ні сюды», - яны чакаюць і глядзяць, а што ж будзе далей, - заўважыў Генадзь Фядыніч.

Падатковая інспекцыя трасе дэкрэтніц і нябожчыкаў

Апошнім часам гісторый пра тое, як у «дармаеды» спрабуюць запісаць нават тых, грамадзян, якія не павінны выплачваць такі падатак, усё больш.

Так, напрыклад, лісты «шчасця» ад падатковай інспекцыі з просьбай пацвердзіць удзел у дзяржвыдатках часта сталі атрымліваць «дэкрэтніцы».

Кацярына з Магілёва стала мамай 1 снежня 2014 года. А літаральна на днях жанчына атрымала паведамленне з падатковай інспекцыі.

- З ліста атрымлівалася, што мая жонка гультайка! Але яна сядзіць у дэкрэце, нашаму дзіцяці яшчэ няма і двух гадоў, мы ў шоку! - абураецца муж Кацярыны Зміцер.

У аналагічнай сітуацыі выявілася Кацярына Гузікава з Магілёва. Дзяўчына вучыцца на дзённым аддзяленні ва ўніверсітэце, а па вечарах падзарабляе афіцыянткай.

- Мне сказалі прынесці дакумент, які пацвярджае, што я вучуся менавіта на дзённым, а не на завочным. Маглі б патэлефанаваць ва ўніверсітэт. Чаму я павінна ісці па даведку і нешта даводзіць? - таксама незадаволеная сітуацыяй Кацярына.

А ў Бабруйску і зусім нядаўна адбыўся кур'ёзны выпадак. Патрабаванне заплаціць падатак прыйшло чалавеку, які памёр 2 гады таму.