Портнікаў аб Менскіх пагадненнях: Пуцін займаецца тым жа, чым Украіна, - цягне час

Украіна хоча санкцыямі давесці расейскую эканоміку да краху, а прэзідэнт РФ спадзяецца, што Захад здыме санкцыі пад ціскам прарасейскага лобі.

Пасля сустрэчы ў нармандскім фармаце ў Нямеччыне Расея не спыніла абстрэлы на лініі судакранання і не спрабуе імплементаваць Менскія пагадненні, а значыць, прэзідэнт РФ Уладзімір Пуцін лётаў у Бэрлін не для таго, каб паспрабаваць змяніць сітуацыю на ўсходзе Украіны. Такое меркаванне выказаў украінскі журналіст і палітычны аглядальнік Віталь Портнікаў у калонцы на сайце NEWSru.ua.

Ён адзначыў, што абстрэлы на Данбасе працягваюцца, таму перамовы ў Бэрліне не служылі для таго, каб змяніць існуючую сітуацыю.

«Пуцін займаецца тым жа, чым займаемся мы з вамі. Мы цягнем час, каб захаваць магчымасць санкцыйнага рэжыму, каб давесці расейскую эканоміку да краху, а расейскую дзяржаву - да развалу, каб агрэсіўная апантанасць Расеі паменшылася, а яе ўлады і жыхары заняліся ўласнымі праблемамі . А Пуцін цягне час, разлічваючы, што Захад рана ці позна здыме санкцыі пад ціскам прарасейскага лобі», - растлумачыў палітычны аглядальнік.

На яго думку, расейскі прэзідэнт усё яшчэ спадзяецца, што да ўлады ў ключавых краінах Захаду прыйдуць людзі, гатовыя дзяліць свет на зоны ўплыву, а таксама на дэстабілізацыю ва Украіне і прыход да ўлады прарасейскага ўрада, які пагодзіцца з акупацыяй Крыма і федэралізацыі краіны.

«Не верыце? А ў Малдове ўжо на нізкім старце прарасейскі кандыдат на пасаду прэзідэнта Ігар Додан, які публічна казаў пра федэралізацыю і які абяцае суайчыннікам усталяваць у краіне пуцінскі рэжым і адмовіцца ад Пагаднення аб асацыяцыі. Чаму Пуцін павінен лічыць, што такі Додан не з'явіцца ў нас?» - падкрэсліў Портнікаў.

Ён адзначыў, што час можа быць на руку Пуціну, а можа быць выкарыстана з карысцю для Украіны.

«Пакуль ён чакае, мы павінны змяняць дзяржаву і ўзмацняць войска, рыхтавацца да немінучага краху пуцінскага рэжыму і вызвалення Данбаса і Крыма ад акупантаў. Мы павінны разумець, што час працуе на нас - але толькі ў тым выпадку, калі мы пабудуем моцную дзяржаву і зможам выкарчаваць з палітыкі і грамадскага жыцця ўсё, што арыентуецца на Крэмль», - падсумаваў журналіст.