Нягледзячы на пратэсты: у Віцебску пачалося будаўніцтва «газпрамаўскай» царквы

«Законных падстаў для забароны або пераносу будаўніцтва Сафійскага сабора, які плануецца пабудаваць у парку, на іншую пляцоўку няма».

Пра гэта гаворыцца ў адказе начальніка аддзела архітэктуры і горадабудаўніцтва Віцебскага гарвыканкама Андрэя Макеева каардынатара аргкамітэта ў стварэнні партыі БХД у Віцебску і Віцебскай вобласці Тацяне Севярынец, піша krynica.info.

У адказе адзначаецца, што на падставе звароту арцыбіскупа Віцебскага і Аршанскага Дзімітрыя і прыходу Сафійскага сабора Віцебска з ініцыятывай будаўніцтва Сафійскага сабора ў Віцебску было вызначана некалькі пляцовак. ТАА «Будгандальсэрвіс» распрацавала архітэктурна-планіровачную канцэпцыю аб'екта на вуліцы Чэхава, якая атрымала ўзгадненне кіраўніка на вылучэнне зямельнага ўчастка для будаўніцтва Сафійскага сабора на вуліцы Чэхава ў Віцебску.

Таксама быў атрыманы дазвол Міністэрства культуры на правядзенне навукова-даследчых і праектных работ на будаўніцтва Сафійскага сабора ў квартале, абмежаваным вуліцамі Чэхава - Суворава - Урыцкага - рака Заходняя Дзвіна ў Віцебску на тэрыторыі гістарычнага цэнтра XII-XX стагоддзяў. Старшыня Віцебскага гарвыканкама 6 лістапада 2014 года зацвердзіў акт выбару месца размяшчэння зямельнага ўчастка пад будаўніцтва сабора.

Згодна з дакументам, у аснову праекта пакладзены генеральны план Віцебска і праект Дэталёвага плана цэнтральнай часткі горада з планам рэгенерацыі гістарычных зон. Акрамя таго, з 24 жніўня да 18 верасня 2015 года было праведзена грамадскае абмеркаванне архітэктурна-планіровачнай канцэпцыі будаўніцтва сабора, паводле вынікаў якога 2 кастрычніка 2015 года на пасяджэнні абласнога архітэктурна-горадабудаўнічага савета быў зацверджаны пратакол з рэкамендацыяй накіраваць праект пасля канчатковай дапрацоўкі і ўзгаднення ва ўстаноўленым законам парадку для правядзення дзяржаўных экспертыз. Грамадскае абмеркаванне справаздачы аб ацэнцы ўздзеяння на навакольнае асяроддзе таксама было праведзена, адзначаюць у гарвыканкаме.

Тым часам на агароджы, якой адгарадзілі частку парку паміж вуліцамі Чэхава і Урыцкага ў Віцебску, з'явілася шыльда «Пашпарт аб'екта». На ёй абвешчана: Сафійскі сабор пачалі будаваць у верасні 2016 года, а скончыць будоўлю плануецца ў жніўні 2018, паведамляе «Радыё Свабода».

Заказчык будоўлі - «прыход Сафійскага сабора», настаяцелем якога прызначаны протаіерэй Міхаіл Мартыновіч. Яго сустрэча з гараджанамі, якія склалі калектыўны ліст да дыктатара з просьбай спыніць знішчэнне парку і перанесці будоўлю ў іншае месца, скончылася выразным супрацьстаяннем мясцовых жыхароў і прадстаўнікоў віцебскай праваслаўнай епархіі. Частка гараджан намагае, што парк трэба захаваць, а новы храм найлепш за ўсё было б паставіць дзе-небудзь у новым мікрараёне, дзе цэркваў, у адрозненне ад цэнтра горада, мала. Ёсць нямала і тых, хто лічыць будоўлю сумнеўным укладаннем фінансавых сродкаў, бо ў Віцебску хочуць пабудаваць «гістарычны помнік», якога ніколі не было - па ўзоры полацкага Сафійскага сабора, якім ён быў у 11-м стагоддзі.

Гэтая ідэя належыць архіепіскапу Віцебскаму і Аршанскаму Дзімітрыю, які сказаў, што гэта будаўніцтва «асабліва актуальна ў сувязі са святкаваннем 1025-годдзя хрышчэння Русі». На «пашпарце аб'екта» размешчана факсімільнае дабраславенне патрыярха Кірылы, дзе таксама гаворыцца пра «ўзнаўленне сабора святой Сафіі, вялікага помніка, які сведчыць пра вытокі праваслаўнага хрысціянства на Белай Русі».

Фінансаванне аб'екта, са слоў віцебскіх чыноўнікаў і царкоўных уладаў, нібыта бярэ на сябе расейскі «Газпрам». Але апошнім часам пра «газпрамаўскіх» фундатараў амаль не чуваць, і віцябляне мяркуюць, што справа неўзабаве дойдзе да «добраахвотных суботнікаў» на ўзвядзенне аб'екта, які не мае ў горадзе ніякай гістарычнай традыцыі. Тым больш што стварыць яго плануюць надзвычай хуткімі тэмпамі.

Зрэшты, акрамя ўзвядзення будынка, трэба ж будзе добраўпарадкаваць прылеглую тэрыторыю. Замест знішчаных дрэў у парку плануюць зрабіць пляцоўку-аўтастаянку, фантан, лаўкі, алеі і гэтак далей. Праз гэтага Віцебск страціць больш за 200 дрэў і зялёную зону, дзе можна было гуляць з дзецьмі і дыхаць свежым паветрам.

Разам з тым віцябляне не раз нагадвалі і мясцовым уладам, і прадстаўнікам царквы, што ў Віцебску шмат недабудаваных аб'ектаў, на якія не стае сродкаў - у тым ліку школы, паліклінікі і дзіцячыя сады. Не кажучы ўжо пра тое, што ў рэгіёне ёсць шмат сапраўдных архітэктурных помнікаў, якія руйнуюцца, бо ў дзяржавы няма грошай, каб іх аднавіць.

Будоўля афіцыйна пачалася, а віцябляне так і не ўбачылі, што яшчэ прадугледжвае апошняя версія праекта Сафійскага сабора. Двойчы гэты праект не праходзіў экалагічную экспэртызу і быў зацверджаны толькі з трэцяга разу, пасля нейкіх нікому не вядомых змен: грамадскага абмеркавання мясцовыя ўлады так і не правялі, хоць павінны былі гэта зрабіць у адпаведнасці з законам.