Рада ЕЗ ухваліла бязвізавы рэжым для Украіны
13- 17.11.2016, 18:45
- 23,052
Краіны Еўразвязу пагадзіліся ўвесці бязвізавы рэжым з Украінай.
Дзяржавы ЕЗ дамовіліся аб скасаванні віз для грамадзян Украіны. Рэалізацыя пагаднення аб бязвізавым рэжыме стане магчымая пасля таго, як будзе ўдасканалены механізм прыпынення дзеяння гэтага рэжыму, паведамляе Reuters .
«Я вельмі рады, што нашая пастанова можа перадаць пазітыўны сігнал перад самітам ЕЗ — Украіна 24 лістапада», — заявіў сталы прадстаўнік Славакіі ў ЕЗ Пітэр Яворчык.
Вітаю довгоочікуване рішення Ради ЄС на рівні послів про безвіз для України
— Петро Порошенко (@poroshenko) November 17, 2016
У панядзелак, 14 лістапада, украінскі прэзідэнт Пятро Парашэнка заклікаў ЕЗ паскорыць выдачу Украіне бязвізавага рэжыму. Паводле ягоных слоў, краіна выканала ўсе неабходныя патрабаванні. «Мы зрабілі 144 рэформы, што было пацверджана спецыяльнай ацэначнай місіяй ЕЗ», — заявіў Парашэнка (цытата з «Лига.Новости»). Неабходныя папраўкі ў заканадаўства Вярхоўная рада прыняла яшчэ ў лютым. Яны маюць на ўвазе ўзмацненне ў сферах барацьбы з карупцыяй, нелегальнай міграцыяй і дыскрымінацыяй.
У верасні стала вядома, што камітэт Еўрапарламенту грамадзянскіх свабод, юстыцыі і ўнутраных спраў падтрымаў увядзенне бязвізавага рэжыму з Украінай.
Гэтая ініцыятыва павінна быць ухваленая ў еўрапейскім парламенце і Радзе Еўропы. На сэсіі ў канцы кастрычніка Еўрапарламент не стаў разглядаць пытанне аб наданні Украіне і Грузіі бязвізавага рэжыму з краінамі Еўразвязу. 23 кастрычніка прэзідэнт Украіны Пятро Парашэнка у інтэрв'ю тэлеканалу «112 Украіна» заяўляў, што бязвізавы рэжым будзе ўхвалены да саміту Украіна — ЕЗ у Брусэлі , які запланаваны 24 лістапада.
Са слоў украінскага прэзідэнта, затрымка з наданнем бязвізавага рэжыму была звязаная са спрэчкай паміж Еўрапарламентам і Еўрапейскай камісіяй аб паўнамоцтвах ў прыпыненні бязвізавага рэжыму для кожнай з краін.
Увядзенне бязвізавага ўезду ў ЕЗ азначае, што ўкраінцы, якія маюць біяметрычныя пашпарты, змогуць знаходзіцца ў краінах Шэнгенскага пагаднення без візы цягам 90 дзён. Тэрмін можа быць павялічаны да 180 дзён для дзелавой паездкі, турыстычнай праграмы або развязання сямейных пытанняў.