Дварковіч даў беларускім уладам час да канца дня
107- 29.11.2016, 13:31
- 29,408
Расейскі бок будзе чакаць канструктыўных прапаноў наконт газу не даўжэй, чым да вечара аўторка.
Беларусь да канца аўторка падасць РФ прапановы для ўрэгулявання газавага пытання, паведаміў журналістам віцэ-прэм'ер Расеі Аркадзь Дварковіч, піша interfax.ru.
"Чакаем ад калегаў прапановы. Да канца сённяшняга дня абяцалі даслаць", - сказаў ён.
"У нас розныя падыходы да гэтага пытання", - адзначыў Дварковіч.
На мінулым тыдні ў Маскву прылятаў Лукашэнка і сустракаўся з прэзідэнтам РФ Уладзімірам Пуціным, але тэма газавай спрэчкі не атрымала развіцця.
Пазней намеснік старшыні "Газпрома" Валерый Голубеў паведамляў, што Беларусь дагэтуль не аплаціла запазычанасць за газ, і што расейскі ды беларускі бакі па-ранейшаму не ўрэгулявалі пытанне аб запазычанасці за пастаўкі газу.
Кіраўнік беларускага Мінэнэрга Уладзімір Патупчык яшчэ месяц таму анансаваў выплату запазычанасці. Але з тых часоў такія планы Беларусі не былі пацверджаныя.
У перыяд са студзеня да верасня 2016 года беларускія спажыўцы назапасілі запазычанасць за пастаўкі газу сумай $340 млн.
Як паведамлялася, у трэцім квартале Расея скараціла пастаўкі нафты ў Беларусь з 5,3 млн тонаў да 3,5 млн тон. Віцэ-прэм'ер Дварковіч і кіраўнік Мінэнэга Аляксандр Новак тлумачылі, што зніжэнне звязанае з канфліктам аб неаплаце Беларусі за расейскі газ. У чацвёртым квартале пастаўкі планавалася дадаткова зрэзаць яшчэ на 500 тысяч тон, да 3 млн тон.