Былога намесніка гендырэктара «Нафтана» асудзілі на 12 гадоў

У Віцебскім абласным судзе вынесены прысуд паводле справы былых службовых асоб Наваполацкага ААТ «Нафтан».

Як паведаміла БелаПАН начальніца аддзела арганізацыйнага забеспячэння судовай дзейнасці абласнога суда Наталля Платаненка, былы гендырэктар матэрыяльна-тэхнічнагазабеспячэння "Нафтана" абвінавачваецца ва ўчыненні злачынстваў, прадугледжаных ч 3 арт 424 КК , ч 1 арт 14 і ч 3 арт 424 КК, ч 3 арт 430 КК (злоўжыванне ўладай, замах на злоўжыванне ўладай або службовымі паўнамоцтвамі, атрыманне хабару ў асабліва вялікай суме), былы начальнік управы вытворча-тэхнічнай камплектацыі прадпрыемства — ч 3 арт 424 КК , ч 1 арт 14 і ч 3 арт 424 КК, ч 3 арт 430 КК, былы начальнік аддзела камплектацыі ААТ "Нафтан" — ч 3 арт 424 КК, ч 1 арт 14 і ч 3 арт 424 КК, ч 2 арт 430 КК, ч 3 арт 430 КК.

Нагадаем, паводле звестак следства, намеснік гендырэктара і двое ягоных падначаленых у мэтах атрымання матэрыяльнай выгады ў чэрвені 2011 года ўступілі ў злачынную змову з трыма прадстаўнікамі камерцыйных структур. Сутнасць супрацьпраўнай дзейнасці ў атрыманні хабару за наданне дапамогі ва ўкладанні кантрактаў з ААТ "Нафтан".

Пры ўкладанні аднаго з кантрактаў у лютым 2013 года абвінавачаныя мелі намер атрымаць пасля ўкладання ўгоды больш за 900 тысяч еўраў, аднак не змаглі давесці свой злачынны намер да канца, бо былі затрыманыя аператыўнымі супрацоўнікамі МУС.

Усяго ж у выніку ўкладзеных кантрактаў з неабгрунтаваным коштам ААТ "Нафтан" была прычыненая шкода больш чым на 46 млрд рублёў, а сума хабараў службовым асобам склала больш за 240 тысяч еўраў.

Падчас папярэдняга расследавання прынятыя следствам захады дазволілі выплаціць прычыненую прадпрыемству шкоду на суму больш за 38 млрд рублёў.

Галоўнага фігуранта злачынстваў суд прыгаварыў да 12 гадоў пазбаўлення волі з канфіскацыяй маёмасці і пазбаўленнем права займаць пасады, звязаныя з выкананнем арганізацыйна-распарадчых і адміністрацыйна-гаспадарчых абавязкаў, а таксама звязаныя з учыненнем юрыдычна значных дзеянняў, на тэрмін пяць гадоў, з адбываннем пакарання ў папраўчай калоніі ва ўмовах ўзмоцненага рэжыму.

Другому фігуранту прысуджана дзевяць гадоў пазбаўлення волі з канфіскацыяй маёмасці і пазбаўленнем права займаць пасады, звязаныя з выкананнем арганізацыйна-распарадчых і адміністрацыйна-гаспадарчых абавязкаў, а таксама звязаныя з здзяйсненнем юрыдычна значных дзеянняў, на тэрмін пяць гадоў, з адбываннем пакарання ў папраўчай калоніі ва ўмовах ўзмоцненага рэжыму.

Трэцяму — сем гадоў пазбаўлення волі з канфіскацыяй маёмасці і пазбаўленнем права займаць пасады, звязаныя з выкананнем арганізацыйна-распарадчых абавязкаў, а таксама звязаныя з здзяйсненнем юрыдычна значных дзеянняў, на тэрмін пяць гадоў, з адбываннем пакарання ў папраўчай калоніі ва ўмовах ўзмоцненага рэжыму.

Суд пастанавіў спагнаць на карысць ААТ "Нафтан" з траіх абвінавачаных у салідарным парадку ў якасці кампенсацыі шкоды, прычыненай злачынствам, 2,182 млн рублёў (дэнамінаваных).

На карысць дзяржавы абвінавачаныя павінны выплаціць больш за 400 тысяч рублёў. Найбольшую суму — амаль 208 тысяч рублёў — былы намеснік гендырэктара.

Прысуд у законнае дзеянне не ўвайшоў, можа быць абскарджаны і апратэставаны ў апеляцыйным парадку ў Вярхоўным судзе.