Луцэнка: На пачатку наступнага года пачнём судовы працэс аб дзяржаўнай здрадзе Януковіча

Для правядзення суда над беглым прэзідэнтам Украіны практычна ўсё гатова.

Судовы працэс паводле справы аб дзяржаўнай здрадзе былога прэзідэнта Украіны Віктара Януковіча можа пачацца на пачатку наступнага года, «а можа быць, і раней». Пра гэта паведаміў генеральны пракурор Украіны Юры Луцэнка.

Відэа яго заявы размясціла ГПУ на сваім канале ў YouTube.

«На пачатку наступнага года, а можа, і раней, мы ўручым абвінаваўчы акт і пачнём судовы працэс аб дзяржаўнай здрадзе Януковіча. Нам для гэтага засталося трохі следчых дзеянняў. Калі святы не перашкодзяць, мы ў найбліжэйшыя месяцы будзем гатовыя завяршыць дасудовае следства», – сказаў Луцэнка.

9 снежня адвакат Януковіча Віталь Сярдзюк заявіў, што вярнуў Луцэнку апавяшчэнне аб падазрэнні, якое было зачытанае былому прэзідэнту ў рэжыме відэаканферэнцыі, «як непрыстойна абвешчанае і неналежным чынам уручанае».

«Наша пазіцыя базуецца выключна на нормах Крымінальнага працэсуальнага кодэкса Украіны, і хачу звярнуць увагу, што адвакат альбо займаецца піярам, альбо дэманструе прававы нігілізм. Луцэнка не аб'яўляў падазрэнні ў судзе. Я гэта падкрэсліваў і ў самім судзе. Я толькі выконваў працэсуальнае дзеянне, растлумачваў сутнасць падазрэння. Гэта розныя рэчы. Уручэнне падазрэння Януковічу адбывалася, калі вайсковыя пракуроры ўручылі яго абаронцам пакет падазрэння», – падкрэсліў Луцэнка.

З ягоных слоў, таксама ГПУ накіравала копіі падазрэння па месцы пражывання Януковіча ў «Межыгор’і», на названыя ім і яго абаронай адрасы ў Растове-на-Доне, а таксама ў растоўскі суд, дзе беглы прэзідэнт выступаў у якасці сведкі аб справе пяці былых супрацоўнікаў «Беркута», якія абвінавачваюцца ў забойстве ўдзельнікаў Еўрамайдана.

Як кажа Луцэнка, ГПУ атрымала з растоўскага суда апавяшчэнне аб тым, што копія падазрэння перададзеная ў мінюст РФ для далейшага ўручэння Януковічу.

«Заявы адваката аб тым, што Луцэнка няправільна ўручыў, проста смешныя. Луцэнка не ўручае падазрэнні, Луцэнка, карыстаючыся выпадкам, што яго чуе сам падазраваны, толькі растлумачыў сутнасць падазрэнняў. Гэта другое дзеянне пасля прадстаўлення», – патлумачыў генпракурор.

Януковіч быў абраны прэзідэнтам Украіны ў 2010 годзе. 22 лютага 2014 года, пасля трох месяцаў пратэстаў на Майдане, Вярхоўная Рада прызнала, што ён самаўхіліўся ад пасады і не выконваў свае абавязкі, пасля чаго былі абвешчаныя новыя прэзідэнцкія выбары. У тым жа месяцы Януковіч пакінуў Украіну, цяпер з сям'ёй жыве ў Расеі.

Ва Украіне супраць Януковіча адкрыта некалькі крымінальных вытворчасцей. Яго абвінавачваюць у масавых забойствах грамадзян, завалоданні дзяржаўнай маёмасцю, захоп улады неканстытуцыйным шляхам, дзеяннях, накіраваных на звяржэнне канстытуцыйнага ладу. У дачыненні да экс-прэзідэнта ўжываецца працэдура завочнага асуджэння.

Падчас відэаапытання 28 лістапада ў Святашынскім раённым судзе Кіева генпракурор паведаміў Януковічу пра падазрэнні ў дзяржаўнай здрадзе. Пісьмовае падазрэнне было ўручана адвакату экс-прэзідэнта.

Генпракуратура выклікала Януковіча на допыт 5 і 9 снежня ў якасці падазраванага, аднак яго адвакат паведамляў, што будзе даваць паказанні ў ГПУ замест экс-прэзідэнта. Ён таксама заяўляў, што Януковіч просіць Генпракуратуру дапытаць яго на тэрыторыі Расеі, таму што баіцца за сваё жыццё.