Рэвалюцыя Трампа

Чаму Пуцін пачаў падлашчвацца да новага гаспадара Белага Дома.

Крытыкі абранага прэзідэнта ЗША павінны спыніцца галасіць, пішуць СМІ, але Трампу трэба растлумачыць пазіцыі наконт сваіх гучных, а то і скандальных заяваў - аб высылцы з ЗША ўсіх нелегальных мігрантаў (а іх 11 млн), пераглядзе ролі NATO, дапушчальнасці выцеку хакерскай інфармацыі. Масква хоча зразумець курс будучай адміністрацыі наконт Расеі: аналітыкі кажуць аб «каляровай рэвалюцыі» ў ЗША, Пуцін спадзяецца, што Трамп «разумны» і ўсведамляе новую адказнасць.

«Няспынным нараканням на тое, што новы гаспадар Белага дома не здольны весці дыскусіі, не мае дыпламатычнага нюху, не разбіраецца ў рэальнай палітыцы і мае ўласныя ўяўленні пра мараль, супрацьпаставіць няма чаго, - прызнае аглядальнік Die Welt (пераклад - inopressa.ru) Ансгар Граў. - Але ўсе гэтыя скаргі згасаюць перад тым фактам, што Трамп у лістападзе ўсё ж здолеў перамагчы на прэзідэнцкіх выбарах у ЗША». «Цяпер усяму свету давядзецца думаць, як адаптавацца да непазбежнага», - гаворыцца ў артыкуле.

Граў канстатуе, што «пачынаючы са студзеня ўсё пойдзе ў менш звыклым рэчышчы» і за самае небяспечнае ўважае «непрадказальнасць выказванняў будучага прэзідэнта ЗША, якія могуць мяняцца з хуткасцю тарнада».

«Абсалютна няважна, ці мае ён намер сапраўды будаваць сцяну на мяжы з Мексікай. Значна важней, ці плануе ён выдаліць з краіны толькі злачынцаў з ліку 11 млн чалавек, якія пражываюць на тэрыторыі ЗША без адпаведных дакументаў, або ўсіх незаконных мігрантаў. Апошняе можа самым негатыўным чынам адбіцца на ўнутранай бяспецы Амерыкі», - гаворыцца ў артыкуле.

«Падчас перадвыбарчай кампаніі Трамп выказваў сумненні ў неабходнасці NATO, - прадаўжае аўтар, - але на днях міністрам абароны быў прызначаны генерал Джэймс Мэціс - вядомы апалагет удзелу ЗША ва ўсіх глабальных праектах». Акрамя таго, Трамп падумвае аб прызначэнні кіраўніком Дзярждэпу ягонага заклятага ворага з рэспубліканскага істэблішменту Міта Ромні - магчыма, Белы дом усё ж зробіць выбар на карысць трансатлантычнага саюза, мяркуе аўтар.

Аднак «часы, калі еўрапейцы ўкладвалі сродкі ва ўмацаванне сацыяльных дзяржаў, у той час як ЗША плацілі за вайскоўцаў, танкі, авіяносцы і дроны, могуць застацца ў мінулым», піша Граў.

«Замест 2% ад ВУП, абумоўленых партнёрамі па альянсу, тая ж Нямеччына накіроўвае на абаронныя патрэбныя толькі 1,2%. Гэты ўзровень, - адзначае аўтар, - ганебна малы ў параўнанні з 3,5% ВУП, якія выдаткоўвае Амерыка, і небяспечна малы на фоне 4,5%, якія выдаткоўвае Расея».

«Настрой у Расеі больш стрыманы, чым я мог чакаць у святле перамогі Трампа, - сказаў адстаўны высокапастаўлены супрацоўнік ЦРУ Мэцью Бероўз. - Нават не магу ўявіць, якая была б роспач, калі б перамагла Хілары Клінтан».

«У нядзелю расейскі прэзідэнт зрабіў Дональду Трампу некалькі двухсэнсоўны камплімент - Пуцін сказаў, што абраны прэзідэнт ЗША досыць разумны, каб усвядоміць: са студзеня ён возьме на сябе адказнасць на зусім новым узроўні», - піша карэспандэнт The Washington Post.

Газета каментуе: «Трамп казаў, што хоча наладзіць палепшаныя стасункі з Пуціным, асабліва ў сферы міжнароднай бяспекі. Гэта дае Крамлю спрыяльныя магчымасці, але выказванні Пуціна - таксама прыкмета занепакоенасці, пра якую кажуць інсайдэры, а менавіта, боязь, што Трамп можа выявіцца непрадказальным партнёрам».