«Будучыня Пуціна даўно і даволі дакладна вызначаная»

У прэзідэнта РФ ёсць толькі два варыянты «сканчэння кар'еры».

Заява прэзідэнта РФ Уладзіміра Пуціна, што ён марыць паспяхова скончыць кар'еру і пачаць падарожнічаць, - звычайны ўкід: расейскі лідар ніколі не адмовіцца ад улады. Пра гэта ў каментары «Гордан» заявіў расейскі апазіцыянер, дэпутат Дзяржаўнай думы РФ у 1995-2000 гадах, старшыня партыі «Заходні выбар» Канстанцін Баравы.

«Пад кантролем Пуціна і ягонага найбліжэйшага атачэння цяпер блізу $2 трыльёнаў. Гэта і афшоры, і афіцыйныя, неафіцыйныя і напаўафіцыйныя актывы як у Расеі, так і на Захадзе. Але здагадка, што прэзідэнт РФ накраў дастаткова і гатовы сысці з улады, няправільная. Пуцін цяжка залежны наркаман, які ўжывае самы небяспечны наркотык у свеце - уладу. Адмовіцца ад гэтага наркотыку ён не ў стане», - перакананы Баравы.

Апазіцыянер упэўнены, што крамлёўскі лідар наўмысна робіць такія заявы, каб пратэставаць уласнае асяроддзе на лаяльнасць.

«Заява Пуціна - гэта тэст, але не для расейскага грамадства, з ім даўно ўсё зразумела. Гэта тэст для ўласнага атачэння, тэст на лаяльнасць. У свой час Іван Жахлівы прарабіў такую штуку: аддаліўся з Масквы ў скіт і ўважліва сачыў, хто і як з баяраў прарэагуе на чуткі, што цар стаміўся ад трона. Пасля гэтага, дарэчы, пачаліся самыя жорсткія садысцкія рэпрэсіі. Пуцін таксама правярае на лаяльнасць сваё асяроддзе, у якім барацьба за рэсурсы і ўплыў набыла агрэсіўна непрыстойныя формы. Не сумняваюся, цяпер пойдзе плынь заяў у стылі «ёсць Пуцін - ёсць Расея, няма Пуціна - няма Расеі», - падкрэсліў Баравы.

Палітычны экспэрт намагае, што ў расейскага лідара два варыянты заканчэння кар'еры, адзін з іх - Міжнародны крымінальны суд за ваенныя злачынствы ва Украіне і Сірыі.

«Будучыня Пуціна даўно і даволі дакладна вызначаная. У яго засталіся два варыянты заканчэння кар'еры. Першы - міжнародны трыбунал, дзе ён будзе галоўным абвінавачаным аб збітым малайзійскім боінгу, уварванні ва Украіну, бамбаванні шпіталяў і школ у Сірыі, забойстве Нямцова, Літвіненкі, Магніцкага. Частка гэтых злачынстваў кваліфікуюцца не проста як крымінальныя, а як злачынствы супраць чалавечнасці», - адзначыў Баравы.

Альтэрнатывай міжнароднаму суду, на думку апазіцыянера, стане натуральная смерць крамлёўскага лідара.

«Другі варыянт заканчэння кар'еры Пуціна, больш шчаслівы для яго, - гэта паспець памерці самому і быць пахаваным, напрыклад, каля Крамлёўскай сцяны. Трэцяга не дадзена, усе пункты незвароту Крамлём даўно пройдзеныя, усе міжнародныя дамовы парушаныя. Ужо ўключыліся ўсе незалежныя міжнародныя і нацыянальныя прававыя механізмы, на якія не зможа паўплываць ніводзін палітык у свеце. Так што будучыня Пуціна вызначаная: альбо міжнародны трыбунал, альбо ўласная смерць», - падсумаваў Баравы.

5 снежня 2016 года на сустрэчы з рабочымі прадпрыемства «Этэрна» ў Чэлябінску кіраўнік РФ Уладзімір Пуцін заявіў, што марыць «паспяхова скончыць сваю кар'еру» і пачаць падарожнічаць.

У адказ на гэта вядомы расейскі сатырык і пісьменнік Віктар Шандаровіч напісаў на сваёй старонцы ў Facebook: «Паспяховае сканчэнне кар'еры дыктатара, на маю сціплую думку, - гэта памерці сваёй смерцю і на волі. Тут, трэба сказаць, нашы інтарэсы даволі адчувальна разыходзяцца».

Пуцін быў кіраўніком Расеі з 2000-га да 2008 года. Пасля гэтага ён займаў пасаду прэм'ер-міністра РФ, а ў 2012 годзе зноў стаў прэзідэнтам краіны.