На Віцебшчыне пачалі апісваць маёмасць «дармаедаў»
85- 8.12.2016, 15:06
- 22,985
Судовыя выканаўцы адбіраюць у людзей нават рабочы інструмент.
У Віцебскай вобласці судовыя выканаўцы пачалі наведваць дамы непрацуючых грамадзян і апісваць іх маёмасць.
Гэта журналістам «Радыё Рацыя» пацвердзілі ў Беларускім Хельсінскім камітэце. Перад гэтым людзям дасылаюцца лісты аб неабходнасці заплаціць падатак.
Само ж апісанне маёмасці не заўсёды праходзіць у рамках закона: сустракаліся выпадкі, калі ў грамадзян апісвалі нават рабочы інструмент.
Гэта недапушчальна, мяркуе прадстаўнік Беларускага Хельсінскага камітэта ў Оршы і рэгіёне Васіль Бераснеў.
«Судовыя выканаўцы на падставе нейкага свайго «закона» прыязджаюць і нахабна апісваюць маёмасць, нават працоўныя прылады. Мы абскардзім гэта, бо рабочыя інструменты нельга забіраць - чалавек не можа пракарміцца і выплаціць кампенсацыю. Думаю, што ў лютым будуць ужо суды. І гэта будзе масавая з'ява», - распавёў Васіль Бераснеў.
Дэкрэт прыносіць шмат праблем самой дзяржаве. Каб спагнаць падатак з тых, хто афіцыйна не працаўладкаваны, дзяржаўныя органы выдаткоўваюць вялікія грошы на ўсе неабходныя працэдуры, дадаў Васіль Бераснеў.
Юрысты, праваабаронцы мяркуюць, што дэкрэт №3 парушае канстытуцыйныя правы грамадзян Беларусі, і патрабуюць яго скасавання.