Рабаў: У снежні беларусаў чакаюць «арэлі» надвор'я
5- 8.12.2016, 21:00
- 13,616
Начальнік службы гідраметэаралагічных прагнозаў распавёў аб надвор'і, якое чакае нас у снежні.
Дзмітрый Рабаў, начальнік службы гідраметэаралагічных прагнозаў Рэспубліканскага цэнтра гідраметэаралогіі, кантролю радыеактыўнага забруджвання і маніторынгу навакольнага асяроддзя Мінпрыроды, распавёў аб надвор'і, якое чакае беларусаў у снежні 2016 года, паведамляе «Еўрарадыё».
У канцы гэтага тыдня ў нашай краіне захаваецца адліга, якую ў пачатку наступнага тыдня зменіць пахаладанне. Уначы тэмпература паветра складзе 4-11 градусаў марозу (пры прасвятленнях — да 15 градусаў ніжэй за нуль). Зноў будзе слізгота. Але за пахаладаннем зноў прыйдзе пацяпленне.
«У снежні нас чакаюць такія «арэлі» надвор'я: то марознае надвор'е, то адліга. Значны перапад атмасфернага ціску, знаны перапад тэмпературы паветра, парывісты вецер», - сказаў Рабаў.
Дзмітрый Рабаў раіць людзям, асабліва метэазалежным, уважліва сачыць за прагнозамі надвор'я.