Абама заклікаў Пуціна спыніць бамбаванне апазіцыі ў Сірыі

Прэзідэнты ЗША і РФ Барак Абама і Уладзімір Пуцін правялі перамовы праз тэлефон, падчас якіх абмеркавалі сітуацыю на Украіне і ў Сірыі.

Прэзідэнт Злучаных Штатаў Барак Абама ў размове з расейскім калегам Уладзімірам Пуціным падкрэсліў, што Расея павінна спыніць паветраныя налёты на пазіцыі ўмеранай апазіцыі ў Сірыі, паведамляе руская служба BBC.

"Прынамсі, прэзідэнт Абама падкрэсліў важнасць таго, каб Расея сыграла канструктыўную ролю, спыніўшы свае паветраныя налёты на месцы размяшчэння ўмеранай апазіцыі ў Сірыі", - паведаміў у сваёй заяве Белы дом.

Прэзідэнты дзвюх краін таксама абмеркавалі сітуацыю на ўсходзе Украіны. Барак Абама заявіў, што прарасейскія сепаратысты павінны выканаць умовы Менскіх пагадненняў.

Пра гэта са спасылкай на прэс-службу Белага дома паведамляе агенцтва Reuters.

Прэс-служба Крамля таксама паведаміла, што прэзідэнты ЗША і Расеі Барак Абама і Уладзімір Пуцін правялі перамовы праз тэлефон, падчас якіх яны абмеркавалі сітуацыю на Украіне і ў Сірыі.

Гутарка лідараў Расеі і ЗША "насіла адкрыты і дзелавы характар", падкрэслілі ў прэс-службе.