Бел-чырвона-белы сцяг вывесілі насупраць райвыканкаму ў Жлобіне

Гэтай акцыяй «Малады Фронт» працягвае акцыю «Люблю Беларусь».

Як паведамляе сайт арганізацыі, сцяг вывешаны ў цэнтры горада на вуліцы Пятроўскага, на галоўнай плошчы.

«Бел-чырвона-белы марафон крочыць па краіне, моладзь смела выходзіць на галоўныя плошчы гарадоў, каб падняць яго над Беларуссю... Радуе таксама, што няма затрыманых. Нашы людзі для нас каштоўныя, таму і робіцца ўсё падрыхтавана і беспамылкова», - падае сайт словы аднаго з лідэраў арганізацыі, былога палітвязня Яўгена Васьковіча.

Сайт charter97.org паведамляў, што акцыя-марафон «Люблю Беларусь» пачалася 4 лютага і будзе доўжыцца 10 дзён. Раней бел-чырвона-белыя сцягі з’явіліся ў Бабруйску і Маладзечне. Скончыцца акцыя ў Менску віншаваннем выбітных дзеячаў беларускай культуры.