Навукоўцы высветлілі, да чаго прыводзіць адсутнасць сняданку
4- 8.02.2016, 14:36
- 6,175
Людзі, якія прапускаюць сняданак пяць ці больш раз на тыдзень, на 36% часцей пакутуюць ад кровазліцця ў мозг.
Гэта паказала новае даследаванне, праведзенае навуковымі супрацоўнікамі Універсітэта Осакі.
Навукоўцы вывучылі звесткі 82 772 чалавек ва ўзросце ад 45 да 74 гадоў з васьмі прэфектур, назіранні за якімі праводзіліся з 1985 да 2010 года. За гэты перыяд быў зафіксаваны 1051 выпадак кровазліцця ў мозг, піша The Japan Times (пераклад - rg.ru).
Як растлумачылі даследчыкі, пропуск сняданку можа быць звязаны з падвышэннем крывянога ціску ўранку. А гэта з'яўляецца фактарам рызыкі кровазліцця ў мозг.
Пры гэтым навукоўцы не заўважылі істотнай розніцы ў распаўсюджанасці ішэмічнага інсульту (інфаркту мозгу). Магчыма, падвышаны ціск менш уплывае на імавернасць інфаркту мозгу, чым на рызыку гемарагічнага інсульту.
У адрозненне ад папярэдніх даследаванняў, праведзеных еўрапейскімі і амерыканскімі навукоўцамі, даследчыкі з Японіі не знайшлі якой-небудзь выразнай асацыяцыі паміж пропускам сняданку і рызыкай сардэчнага прыступу. Магчыма, гэта звязана з больш нізкім узроўнем атлусцення ў Японіі.