Пастаўшчыкі падаюць у суд на ProStore праз запазычанасць
7- 20.04.2016, 10:24
- 7,270
Гіпермаркет арыштаванага алігарха Юрыя Чыжа доўгі час не плаціць пастаўшчыкам за тавар.
У ProStore кажуць, што «ўсё добра», хоць на паліцах бачны недахоп асартыменту. «Няма паставак пакуль», - коратка адказваюць супрацоўніцы супермаркета. Іншых тлумачэнняў не даюць.
«Еўрарадыё» звярнулася да пастаўшчыкоў гандлёвай сеткі. Прадстаўнік адной з птушкафабрык кажа, што ў ProStore маецца запазычанасць, але прыблізную суму назваць адмаўляецца, маўляў, камерцыйная таямніца. На пытанне, як даўно няма разліку за тавар, адказваюць так:
«Не тыдзень і не два. Тэрмін значна большы. Мы ведаем, што ў іх праблемы, але цярпліва чакаем. Нам пастаянна абяцаюць, маўляў, яшчэ крыху, і выйдзем з крызісу, усё будзе добра, як раней. А раней яны плацілі вельмі добра. Ну, час цяпер складаны, мы ўсе разумеем, ідзем насустрач».
Прадстаўнік піваварнай кампаніі таксама кажа пра пратэрмінаваную запазычанасць:
«На гэты момант уся запазычанасць сеткі ProStore перад намі пратэрмінаваная. Яна ўжо цягнецца больш чым 45 дзён».
Дырэктар фермерскай гаспадаркі «Астравецкае», якое арганізавала пастаўкі індычыны ў крамы ProStore, кажа, што праз пратэрмінаваную запазычанасць нават падалі ў суд.
«Так, мы падалі ў суд. Справа знаходзіцца там, суд выносіць сваю пастанову».
У Міністэрстве гандлю ніякіх каментароў аб праблемах гэтай гандлёвай сеткі не даюць. Адмаўляюцца тлумачыць сітуацыю і ў адміністрацыі ProStore.