Забойцу актывіста з Быхаўскага раёна прысудзілі да 11 гадоў калоніі

Быхаўскі актывіст і праваабаронца Аляксандр Шачанок быў вядомы сваёй дзейнасцю ў спыненні неправамерных дзеянняў мясцовай міліцыі.

Суд Быхаўскага раёна прысудзіў мясцовага жыхара Віталя Лашкова да 11 гадоў калоніі паводле абвінавачвання ў забойстве грамадскага актывіста і праваабаронцы Аляксандра Шачанка, паведамляе БелаПАН.

Нагадаем, Аляксандр Шачанок прапаў без вестак. Апошнім разам яго бачылі 27 жніўня 2014 года ў Быхаўскім раённым судзе, дзе праходзіў разгляд позвы актывіста ў дачыненні да яго суседа, які абвінавачваецца ў нанясенні цяжкіх цялесных пашкоджанняў - чэрапна-мазгавой траўмы. На маючым адбыцца апошнім пасяджэнні меркавалася, што Шачанок выступіць з хадайніцтвам аб змене меры стрымання адказчыку, бо той нібыта выказваў пагрозы ў яго адрас.

Труп Шачанка быў знойдзены амаль праз год - 27 чэрвеня 2015 года, у лясным масіве каля вёскі Вароніна Быхаўскага раёна. У забойстве быў абвінавачаны сын вышэйзгаданага суседа Шачанка 37-гадовы жыхар Быхава, які прызнаўся ў злачынстве.

Прысуд Лашкову быў вынесены Быхоўскім судом 27 красавіка, паведаміў магілёўскі праваабаронца Барыс Бухель. З яго слоў, падсудны быў прызнаны вінаватым па ўсіх выстаўленых абвінавачаннях: у забойстве, знішчэнні афіцыйных дакументаў Шачанка, незаконным захоўванні боепрыпасаў, крадзяжы колавых каўпакоў з мікрааўтобуса. Суд прысудзіў Лашкова да 11 гадоў калоніі ўзмоцненага рэжыму. Асуджаны таксама павінен кампенсаваць маральную шкоду сужыцельцы забітага 300 млн. рублёў.

«Прэтэнзій да суда ў мяне, як у праваабаронцы, няма. Праўда, я прасіў вынесці прыватнае вызначэнне ў адрас Быхаўскага РАУС, але мне сказалі, што я не старана ў справе. Але ж я, як сведка, падаў усе дакументы, што забойства магло б і не быць, калі б міліцыя прыняла своечасова меры да бацькі асуджанага», - заявіў Бухель.

Адзначым, што Аляксандр Шачанок вёў актыўную грамадскую дзейнасць. Неаднаразова звяртаўся са скаргамі ў праваахоўныя органы адносна неправамерных, на яго думку, дзеянняў асобных супрацоўнікаў Быхаўскага РАУС, якія пасля падпадалі пад дысцыплінарныя спагнанні свайго кіраўніцтва.

Падчас выбараў у мясцовыя органы ўлады ў сакавіку 2014 года Шачанок уваходзіў у ініцыятыўную групу кандыдата ў дэпутаты ад Беларускай сацыял-дэмакратычнай партыі (Грамада) Леаніда Падбярэцкага.