Еўрадэпутат: Мы не атрымалі адказаў на ўсе пытанні на сустрэчы з Ярмошынай

У ЦВК запэўнівалі дэпутатаў, што з выбарчым заканадаўствам «усё ў парадку», а на ўнясенне змяненняў няма часу.

Учора дэлегацыя кіроўнай фракцыі Еўрапарламента, Еўрапейскай народнай партыі сустрэлася з кіраўніцтвам Цэнтрвыбаркама. Тэма абмеркавання - будучая парламенцкая кампанія ў Беларусі. Дэпутат з Еўрапарламента ад Латвіі Сандра Калніетэ распавяла tut.by аб выніках размовы з беларускім ЦВК.

Са словаў еўрадэпутата, яны спрабавалі данесці да Лідзіі Ярмошынай, што «выбары - гэта не толькі тэхнічнае пытанне».

- Гэтыя выбары сур'ёзна паўплываюць на палітычныя дачыненні Беларусі з Еўразвязам. Я спадзяюся, яна [Ярмошына] зразумела наш пасыл.

Калніетэ адзначыла, што на сустрэчы дэпутаты Еўрапарламента прааналізавалі ўсе рэкамендацый АБСЕ паводле вынікаў апошніх «выбараў прэзідэнта».

- Мы спрабавалі зразумець, што было і будзе зроблена перад выбарамі. Нас у першую чаргу цікавілі працэдура галасавання, падлік галасоў і звесткі вынікаў выбараў. Мы не атрымалі поўных адказаў на ўсе нашы пытанні.

Са словаў еўрадэпутата, у ЦВК адказвалі альбо, што ўсё ўжо ў парадку, альбо што ў асобных пазіцыях такіх канкрэтных патрабаванняў АБСЕ няма, альбо - што на ўнясенне змяненняў няма часу.

- Мы гаварылі пра неабходнасць роўных умоў для апазіцыі, нам сказалі, што ўжо ёсць і заўсёды былі роўнымі.

Кажучы пра ўражанні ад сустрэчы з намесніцай кіраўніка МЗС Аленай Купчыной, Калніетэ падкрэсліла, што ў іх добрыя працоўныя стасункі.

- Яна вельмі добра разумее сітуацыю. Але я таксама разумею, будучы службовай асобай, яна мае такое поле манеўру, якое дае Лукашэнка. Мы цэнім яе намаганні ў наладжванні стасункаў Беларусі з ЕЗ.

У гэтым годзе Еўрапарламент спадзяецца ўдзельнічаць у назіранні за выбарамі ў Беларусі. І калі запрашэнне прыйдзе, то місія еўрадэпутатаў прыедзе, запэўніла дэпутат.

Сандра Калніетэ прадстаўляе Еўрапейскую народную партыю, на сёння - кіроўную ў Еўрапарламенце. Гэтая фракцыя спрыяла стварэнню правацэнтрысцкай кааліцыі ў беларускай апазіцыі. А ўчора трое еўрадэпутатаў і апазіцыйныя лідары правялі супольны круглы стол. Пытаем, як Калніетэ ацэньвае тое, што адбываецца сёння ў апазіцыі.

- Я адчуваю, што расце разуменне неабходнасці аб'ядноўваць намаганні вакол дэмакратычных і праеўрапейскіх каштоўнасцей, каб пазбегнуць фрагментацыі галасоў. Пасля 20 гадоў ціску [апазіцыі] цяжка выйсці з гэтай фрустрацыі і навучыцца ісці на кампрамісы. Але гэта адзіны шлях для апазіцыі і грамадзянскай супольнасці, каб давесці, што яны гатовыя працаваць на карысць беларускага народа.

«Парламенцкія» выбары павінны быць прызначаныя Лукашэнкам у пачатку чэрвеня і адбудуцца 11 верасня.