Coca-Colа выказалася з нагоды дызайну ўпакоўкі алею Cocachoka з Магілёва

Магілёўскі вытворца скапіяваў дызайн этыкеткі ў сусветна вядомага напою.

Нагадаем, кампанія «Галоўмалзаб» выпусціла шакаладны спрэд пад назвай Cocachoka. Дызайн упакоўкі прадукту вельмі моцна нагадвае дызайн сусветна вядомага напою. Хоць вытворца кажа, што ёсць пэўнае падабенства шрыфту, але не больш за тое. Але ў беларускім прадстаўніцтве кампаніі Coca-Cola мяркуюць інакш, піша onliner.by.

- Мяркую, у гэтым выпадку мае месца патэнцыйнае парушэнне правоў на таварны знак Coca-Cola і праява нядобрасумленнай канкурэнцыі, - адзначыла кіраўніца прадстаўніцтва Наталля Тарасевіч.

Паводле яе слоў, візуальнае падабенства вонкавага выгляду тавару Cocachoka і этыкеткі напою, які выпускаецца пад таварным знакам Coca-Cola, вялікае.

- Магчымае парушэнне пацвярджаюць вынікі апытання на вашым партале: у апытанні паўдзельнічала 21 915 чалавек, з іх 92% мяркуюць, што ўпакоўка алею паўтарае дызайн нашага напою (статус на 24 траўня 2016 года), - кажа Наталля. - Мы цяпер аналізуем сітуацыю і абмяркоўваем нашы далейшыя дзеянні.

Як адзначылі ў прадстаўніцтве, The Coca-Cola Company валодае выключнымі правамі ў Рэспубліцы Беларусь на сусветна вядомы брэнд Coca-Cola: таварныя знакі належным чынам зарэгістраваныя і выкарыстоўваюцца ў Беларусі.

- У рэспубліцы напоі пад таварнымі знакамі Coca-Cola, Fanta, Sprite вырабляе ўнітарнае прадпрыемства «Кока-Кола Беўрыджыз Беларусь» на падставе ліцэнзійнай дамовы, - адзначае Наталля Тарасевіч. - Кампанія The Coca-Cola Company з'яўляецца найбуйнейшым вытворцам безалкагольных напояў і з вялікай увагай ставіцца да захавання правоў на свае таварныя знакі. Мы вядзем сталы маніторынг рынку. Кожны такі выпадак старанна аналізуецца, і паводле вынікаў залежаць неабходныя далейшыя крокі.