Нацбанк рэкамендуе пачаць выдачу новых грошай у банкаматах ужо з 1 ліпеня
85- 5.05.2016, 17:41
- 13,610
Нацыянальны банк Беларусі рэкамендаваў камерцыйным банкам ужо з 1 ліпеня арганізаваць выдачу ў банкаматах грашовых знакаў узору 2009 года.
Улічваючы, што менавіта ў першыя дні правядзення дэнамінацыі прагназуецца найбольш высокі попыт з боку насельніцтва на новыя грашовыя знакі, банкам рэкамендавана ўжо з 1 ліпеня забяспечыць працу асобных банкаматаў і правядзенне шэрагу банкаўскіх аперацый, уключаючы валютна-абменныя, з выкарыстаннем грашовай гатоўкі ўзору 2009 года, піша naviny.by.
Пры гэтым пералік банкаматаў, якія будуць загружаныя новымі банкнотамі, павінен быць вызначаны загадзя, а адпаведная інфармацыя своечасова размешчаная на інфармацыйных стэндах, сайтах і г.д. Згаданую інфармацыю неабходна падтрымліваць у актуальным стане аж да поўнага пераводу ўсіх банкаматаў на працу з банкнотамі ўзору 2009 года.
Цягам месяца з пачатку правядзення дэнамінацыі Нацбанк не будзе спаганяць з банкаў плату за падмацаванне новымі банкнотамі, цягам шасці месяцаў - манетамі. Банкам прапанавана ўжываць аналагічны падыход у дачыненні да сваіх кліентаў.
Банкам таксама рэкамендавана цягам шасці месяцаў з пачатку правядзення дэнамінацыі арганізаваць у сваіх касах бясплатны размен банкнот на манеты.