Нацбанк распавёў пра асноўныя фінансавыя пагрозы

У Нацыянальным банку заявілі аб назапашаных крэдытных рызыках.

Асноўныя пагрозы фінансавай стабільнасці Беларусі сёння звязаныя з рэалізацыяй назапашаных крэдытных рызык ва ўмовах пагаршэння фінансавага становішча прадпрыемстваў і зніжэння дзелавой актыўнасці.

Пра гэта заявілі 5 траўня на пашыраным пасяджэнні праўлення Нацыянальнага банка.

Як паведамляе прэс-служба галоўнага банка краіны, на пасяджэнні, дзе разглядаліся вынікі рэалізацыі грашова-крэдытнай палітыкі ў першым квартале 2016 года, было адзначана, што доля праблемных актываў банкаўскага сектара на 1 красавіка дасягнула 11,5%, што аказвае негатыўны ціск на фінансавы вынік і капітал банкаў.

Праблема крэдытнай рызыкі развязваецца падчас сумесных абмеркаванняў з удзелам Нацбанка, урада, камерцыйных банкаў і найбуйнейшых крэдытаатрымальнікаў. Большасці прадпрыемстваў, якія сутыкнуліся з праблемай пагаршэння фінансавага стану, банкі аказалі дапамогу ў рэфінансаванні запазычанасці і пераразмеркаванні пазыковай нагрузкі зыходзячы з патокаў выручкі, якая паступае.

Разам з тым, як адзначаюць у Нацбанку, абмежаваць крэдытныя рызыкі толькі за кошт банкаўскага сектара не ўяўляецца магчымым. "Для недапушчэння пагаршэння паказчыкаў дзейнасці банкаў неабходна ўрэгуляваць праблему неабслугоўваных крэдытаў, забяспечыць актыўнае выкарыстанне механізму санацыі жыццяздольных структур і вывядзення з рынку "хранічна" неэфектыўных прадпрыемстваў", - заяўляе галоўны банк краіны.

Найважнейшай задачай, на думку Нацбанка, цяпер з'яўляецца актывізацыя работы ў дэдаларызацыі эканомікі. У сувязі з гэтым Нацбанк выступіў з ініцыятывай распрацаваць сумесны з урадам план мерапрыемстваў, які прадугледжвае ўсебаковыя захады ў дэдаларызацыі эканомікі і выразны графік іх рэалізацыі.

Як было адзначана падчас паседжання, на фоне неспрыяльнай знешнеэканамічнай сітуацыі ў першым квартале 2016 года Нацбанкам і банкамі ў цэлым дасягнуты пастаўленыя на гэты перыяд задачы. Запаволенне тэмпаў росту грашовай масы, фармаванне чыстай прапановы замежнай валюты на ўнутраным валютным рынку, нармалізацыя сітуацыі на дэпазітным рынку абумоўліваюць памяншэнне інфляцыйнага ціску ў краіне. Гэта стварае магчымасці для паступальнага зніжэння рэальных працэнтных ставак у эканоміцы, улічваючы іх дастаткова высокі цяперашні ўзровень.

"Адпаведна, адной з задач для банкаўскай сістэмы найбліжэйшым часам застанецца "нармалізацыя" рызыка-прэміі, якая закладзеная ў працэнтных стаўках як ў дэпазітах, так і ў крэдытах. Яе развязанне будзе ажыццяўляцца паступальна, з улікам комплекснага аналізу існых макраэканамічных рызык і прагнозу развіцця эканомікі краіны", - заяўляюць у Нацбанку.

Адначасова будзе працягнутае рэгуляванне грашовай прапановы.

За першы квартал 2016 года тэрміновыя дэпазіты насельніцтва ў беларускіх рублях знізіліся на 1,4 трлн. рублёў, у замежнай валюце - на 153 млн. даляраў ЗША.

Такая сітуацыя, на думку Нацбанка, "шмат у чым тлумачыцца імкненнем хатніх гаспадарак захаваць выдаткі на канчатковае спажыванне ва ўмовах зніжэння рэальных грашовых даходаў за кошт выкарыстання наяўных зберажэнняў". Сярод іншых фактараў, якія надаюць уздзеянне на паводзіны насельніцтва, галоўны банк краіны таксама адзначае студзеньскі ўсплёск дэвальвацыйных чаканняў і змененыя ўмовы функцыянавання дэпазітнага рынку.