Улады ЗША прад'явілі двум беларускім хакерам завочныя абвінавачванні

Беларусы былі затрыманыя ў Менску ў сувязі з расследаваннем дзейнасці міжнароднай хакерскай групоўкі.

Пракуратура штата Пенсільванія прад'явіла двум грамадзянам Беларусі завочныя абвінавачванні ў дачыненні да крадзяжу 1,35 млн. дяляраў з дапамогаю кібератак на банк. Пра гэта заявіў журналістам у Пітсбургу пракурор Заходняй акругі Пенсільваніі Дэвід Хіктан, паведамляе ТАСС.

Гаворка ідзе пра 34-гадовага Аляксея Я. і 41-гадовага Ягора П. Паводле звестак уладаў ЗША, абодва яны былі затрыманыя ў Менску ў сувязі з расследаваннем дзейнасці міжнароднай хакерскай групоўкі. Як сцвярджае пракуратура, мужчыны датычныя да крадзяжу 1,35 млн. даляраў з рахунку ў амерыканскім банку базуецца ў Пенсільваніі нафтагазавай кампаніі Penneco Oil.

«Гэтыя затрыманні дэманструюць, што мы будзем браць пад крымінальны пераслед за мяжой і ва ўсім свеце тых, хто ўваходзіць у злачынныя групоўкі, і дамагацца, каб яны панеслі пакаранне», - сказаў Хіктан.

Раней у сталіцы былі затрыманыя двое менчукоў 1981 года і 1974 гадоў нараджэння, якія з'яўляліся актыўнымі ўдзельнікамі злачыннай групы. Хакеры з дапамогай шкоднаснага праграмнага забеспячэння атрымлівалі рэквізіты банкаўскіх рахункаў розных кампаній, а затым спрабавалі легалізаваць скрадзеныя грошы праз фіктыўныя фірмы ў Беларусі, Кітаі, Бангладэш і іншых краінах.

У дачыненні да затрыманых жыхароў сталіцы прыменена мера стрымання ў выглядзе ўзяцця пад варту. Ім пагражае пакаранне ў выглядзе пазбаўлення волі на тэрмін ад 6 да 15 гадоў з канфіскацыяй маёмасці і з пазбаўленнем права займаць пэўныя пасады або займацца пэўнай дзейнасцю або без пазбаўлення.

Следчы камітэт падкрэслівае, што паспяхова завяршыць аперацыю атрымалася дзякуючы суладным дзеянням беларускіх праваахоўнікаў з Федэральным бюро расследаванняў ЗША.