Беларускія ідэолагі не ведаюць, чый Крым
12- 7.05.2016, 20:46
- 28,243
У Магілёўскім гарвыканкаме не ведаюць, чый Крым.
Гэта вынікае з адказу ідэолагаў на зварот намесніка старшыні Беларускай сацыял-дэмакратычнай партыі «Грамада» Ігара Барысава, паведамляе «Радыё Свабода».
Партыец паспрабаваў высветліць, чаму ў гарадскіх крамах і крамах канцылярскіх тавараў прадаюць глобусы, на якіх Крым паказаны часткай Расеі. У сваіх зваротах да ўпраў ідэалагічнай працы ды гандлю і паслуг актывіст запатрабаваў, каб гэтую прадукцыю знялі з продажу.
«Каб яны не ўводзілі ў зман пакупнікоў, бо Беларусь афіцыйна не прызнае анэксіі Крыму Расеяй, і гэта неаднаразова падкрэсліваў Аляксандр Лукашэнка», - даводзіў да чыноўнікаў сваю пазіцыю Ігар Барысаў.
«Пытанні замежнай палітыкі не ўваходзяць у кампетэнцыю ўправы. Для тлумачэнні пытанняў, звязаных з вывучэннем чыннікаў і тэндэнцый міжнароднага развіцця, міжнароднага становішча, з замежнай і ўнутранай палітыкай замежных дзяржаў, вызначэнне прыярытэтаў заменаэканамічнай дзейнасці Вы можаце звярнуцца ў Міністэрства замежных спраў Рэспублікі Беларусь», - адпісалі партыйцу ідэолагі з Магілёўскага гарвыканкама.
Што да адказу з управы гандлю і паслуг гарвыканкама, то, са слоў Ігара Барысава, чыноўнікі паведамілі яму, што яны накіравалі запыт у Міністэрства замежных спраў Беларусі для «разгляду пытання».
«Ідэолагі гарвыканкама проста самаўхіліліся ад адказу на мой зварот» - каментуе адказы чыноўнікаў сацыял-дэмакрат.