Скот Роланд: Санкцыі супраць рэжыму Лукашэнкі ЗША разгледзяць пасля «выбараў»
15- 1.06.2016, 7:59
- 13,407
Канчатковая пастанова пра лёс санкцый ЗША ў дачыненні да ўладаў Беларусі будзе прынятая паводле вынікаў парламенцкіх выбараў у краіне.
Пра гэта заявіў часовы павераны ў справах ЗША ў Беларусі Скот Роланд у праграме «Буйным планам», якая была паказана ўвечары 31 траўня на тэлеканале «Беларусь 1».
Дыпламат не пагадзіўся з тым, што ў стасунках паміж Беларуссю і Злучанымі Штатамі Амерыкі цяпер адбываецца працэс перазагрузкі, піша БелаПАН.
«Перазагрузка мяркуе, што мы неяк пачынаем з нуля. Я думаю, што нашы стасункі, хоць за апошнія гады былі не самыя найлепшыя, але таксама не былі на такім нізкім узроўні, што трэба карыстацца словам» перазагрузка», - адзначыў Роланд.
Кажучы пра магчымасць поўнага зняцця санкцый, дыпламат заявіў, што ЗША хочуць бачыць у Беларусі прагрэс у галіне дэмакратыі і правоў чалавека. «Гэта асабліва важна сёлета, летам і восенню, калі будуць парламенцкія выбары. І мы даволі выразна сказалі, што хочам бачыць яшчэ прагрэс у гэтай галіне. І пасля гэтых выбараў паглядзім, як далей», - сказаў ён.
Роланд адзначыў, што ўважае прынцыпы АБСЕ ў дачыненні да выбараў «залатым стандартам для нас усіх», і ў ЗША ўважліва сочаць за аналізам выбараў у розных краінах з боку Бюро дэмакратычных інстытутаў і правоў чалавека (БДІПЧ) АБСЕ.
«Я думаю, што ні ў якой краіне ў свеце няма дасканалай выбарчай сістэмы. Мы павінны імкнуцца да ідэалу, але мы людзі, а людзі памыляюцца», - мяркуе часовы павераны.
Пры гэтым ён адзначыў, што пры ацэнцы любых выбараў назіральнікамі БДІПЧ у аснову заўсёды ставіцца іх празрыстасць. «Я думаю, што і для вашых выбараў у парламент сёлета [гэта актуальна]», - заявіў дыпламат.
Адзначаючы пацяпленне ў стасунках паміж Беларуссю і Злучанымі Штатамі, Роланд, дыпмісія якога заканчваецца ў ліпені, сказаў: «Я рады, што тут быў у гэты перыяд. І мы ўсе гулялі ролю ў гэтым, і Міністэрства замежных спраў, і еўрапейскія дыпламаты, і нашы дыпламаты, у Брусэлі і Вашынгтоне. Мы ўсе бачылі магчымасці ісці да нейкіх паляпшэнняў у стасунках нашых краін. Я рады, што гэты працэс пачаўся. Але я думаю, што ёсць яшчэ даволі далёкі шлях перад намі. Мы гатовыя, я спадзяюся, ісці далей».
29 красавіка ЗША прадоўжылі прынятую ў пасля прэзідэнцкіх выбарах у Беларусі пастанову аб змякчэнні санкцый у дачыненні да беларускіх прадпрыемстваў да 31 кастрычнiка 2016 года. Санкцыі ў дачыненні да шэрагу беларускіх прадпрыемстваў былі ўведзеныя на падставе ўказа прэзідэнта Джорджа Буша ад 16 чэрвеня 2006 года ў сувязі з парушэннем правоў чалавека ў Беларусі і з тых часоў перыядычна падаўжаліся. У санкцыйны спіс уваходзяць «Беларускі нафтавы гандлёвы дом», канцэрн «Белнафтахім», Belneftekhim USA Inc., ААТ «Белшына», ААТ «Гродна Азот», ААТ «Гродна Хімвалакно», ААТ «Лакафарба», ААТ «Нафтан» і ААТ «Полацк-Шкловалакно».