У Варшаве праходзіць саміт кіраўнікоў МЗС ЕЗ у пытанні Brexit
1- 27.06.2016, 14:34
- 7,746
Міністры сустрэліся ў Варшаве для абмеркавання магчымых сцэнароў пасля выхаду Вялікай Брытаніі з ЕЗ.
Пра гэта распавёў кіраўнік прэс-службы МЗС Рафал Сабчак.
Паводле ягоных слоў, сустрэча міністраў замежных спраў большасці краін ЕЗ адбудзецца сёння пасля абеду. Пры гэтым кіраўнік прэс-службы МЗС Польшчы не ўдакладніў спіс удзельнікаў сустрэчы, паведамляе «Радыё Польшча».
«Паколькі гэтая ініцыятыва з'явілася нядаўна, прадаўжаюцца кансультацыі з нашымі партнёрамі. Мы хочам, каб сустрэча адбылася ў як мага шырокім коле. Мы мяркуем, што неабходна размаўляць з усімі, адсюль і гэтая ініцыятыва міністра Вашчыкоўскага», - паведаміў Рафал Сабчак.
Паводле ягоных слоў, міністры замежных спраў ЕЗ могуць сустракацца ў розных фарматах у рамках ЕЗ, але важна, каб гэта была партнёрская дыскусія.
Раней паведамлялася, што кіраўнік МЗС Польшчы Вітольд Вашчыкоўскі арганізуе ў панядзелак 27 чэрвеня ў Варшаве саміт кіраўнікоў дыпламатыі большасці еўрапейскіх краін.
Мэтай сустрэчы будзе абмеркаванне вынікаў рэферэндуму ў Вялікай Брытаніі, на якім большасць жыхароў краіны прагаласавалі за выхад з складу Еўразвязу.
Саміт будзе арганізаваны як адказ на сустрэчу 6 краін-заснавальніц ЕЗ, якая адбылася 25 чэрвеня ў Берліне.
Нагадаем, паводле вынікаў рэферэндуму, які адбыўся 23 чэрвеня ў Вялікай Брытаніі перамогу атрымалі прыхільнікі выхаду краіны з ЕЗ. За такую пастанову прагаласавалі 51,9% выбаршчыкаў. Супраць - 48,1%.