Улады пакінулі магілёўцаў без батанічнага саду
3- 24.07.2016, 15:46
- 15,206
Чыноўнікі не падтрымалі ініцыятыву грамадскасці пра стварэнне батанічнага саду ў раёне Падніколля.
У 2014 годзе магілёўскія ўлады надумалі стварыць у Падніколлі парк адпачынку, былі пачатыя працы добраўпарадкавання тэрыторыі. Аднак многія магілёўцы выступілі супраць з'яўлення ў гэтым месцы – паміж Свята-Нікольскім кляштарам і аднаўлянай Пакроўскай царквой – зоны забаваў, піша nn.by.
Была вылучаная сустрэчная ініцыятыва – стварыць у Падніколлі батанічны сад. Збор подпісаў за яе рэалізацыю праходзіў у розных формах – як традыцыйна, так і на розных інтэрнэт-платформах.
Ідэя знайшла падтрымку і ў Нацыянальнай акадэміі навук, дзе прызналі, што сетка батанічных садоў у Беларусі развітая недастаткова і значна саступае заходнееўрапейскім дзяржавам, Расеі і Украіне.
Улады Магілёва ў сваю чаргу заяўляюць, што размяшчэнне батанічнага саду ў Падніколлі разыходзіцца з генеральным планам Магілёва, зацверджаным указам прэзідэнта 28 ліпеня 2003 года.
Між тым гарвыканкам мае права ініцыяваць змены генплана. «Таму інфармацыйная кампанія ў падтрымку стварэння прыроднай славутасці будзе прадоўжаная», – паведаміў адзін з ініцыятараў стварэння батанічнага саду ў Магілёве Леанід Платаненка.