У нямецкім Ансбахе прагрымеў выбух
9- 25.07.2016, 7:31
- 18,295
Інцыдэнт можа стаць другім тэрактам на тэрыторыі Нямеччыны за тры дні.
Увечары ў нядзелю ў баварскім горадзе Ансбах адбыўся выбух, праз які загінуў адзін чалавек і пацярпелі блізу дзесяці.
Выбух здарыўся аб адзінаццатай гадзіне вечара (дванаццатай гадзіне паводле менскага часу) ля аднаго з рэстаранаў горада. Бомба спрацавала ля столікаў на вуліцы, паведамляе Інтэрфакс.
Паліцыя падазрае ў падрыве 27-гадовага выхадца з Сірыі, які прыехаў у Нямеччыну два гады таму. Летась яму адмовілі ў прашэнні аб прытулку. Паводле інфармацыі паліцыі, загінулы ўжо двойчы спрабаваў забіць сябе. Некаторы час ён знаходзіўся на лячэнні ў псіхіятрычнай клініцы. Акрамя таго, улады федэральнай зямлі Баварыя не выключаюць ісламісцкага падтэксту таго, што здарылася.
У заплечніку з выбухоўкай знаходзіліся дробныя металічныя элементы. Таксама пры загінулым выявілі тэлефон, які перадалі спецыялістам для даследавання. Паліцыя паспрабуе высветліць, з кім меў кантакты падазраваны.
Паводле папярэдняй інфармацыі, падазраваны паспрабаваў патрапіць на трохдзённы музычны фестываль Ansbach Open, які сабраў 2,5 тысячы гледачоў, аднак гэта яму не ўдалося. Пасля паведамлення аб выбуху людзей эвакуявалі з месца правядзення фестывалю.
Выбух у Ансбахе адбыўся на фоне стральбы ў Мюнхэне, якая здарылася ў мінулую пятніцу. Грамадзянін Нямеччыны іранскага паходжання адкрыў агонь з пісталета. Тады загінулі дзесяць чалавек, большасць з якіх падлеткі.