Берасцейцы 2,5 гады дамагаюцца выплаты запазычанасці ў заробку: Адчуванне, што законы не для нас
7- 27.07.2016, 15:56
- 6,870
У замкнёнае кола заканадаўчых затрымак патрапілі пяць работнікаў ТАА «Аканціт».
Пасля таго як прадпрыемства перастала плаціць заробак, яны звольніліся і пайшлі ў суд. Справу хлопцы выйгралі, але радасць была нядоўгай. Выявілася, вярнуць запазычанасць 304 мільёны недамінаваных рублёў - той яшчэ квэст, піша onliner.by.
Берасцейская кампанія «Аканціт» працавала ў сферы цеплаэнэргетыкі і газазабеспячэння. Прадпрыемства невялікае, заробкі былі ад 2,5 да 5 млн у залежнасці ад пасады. На той момант гэта складала $300-580.
- Заробак перасталі плаціць са снежня 2013 года. Дзесьці так. Усё як заўсёды - казалі, маўляў, пацярпіце, грошай няма. У прынцыпе, і раней пару разоў так было, на месяц затрымлівалі, але потым спраўна плацілі. Мы пачакалі месяц, іншы, але грошай не выплацілі, - тлумачыць адзін з пяці работнікаў, якія падалі ў суд, Вадзім Кузьміцкі. У ТАА «Аканціт» хлопец працаваў на інжынернай пасадзе.
У сакавіку 2014 года, пасля чатырох месяцаў затрымкі заробку, працаўнікі сталі звальняцца. Усе пяцёра падалі ў суд.
- Нашы судовыя пазовы ўсе задаволілі. Суд прыняў пастанову выплаціць не толькі заробак, але і кампенсацыю за кожны дзень пратэрміноўкі, ,/i>- тлумачыць Вадзім. - Сумы атрымаліся розныя: ва Уладзіміра Плетнюка - 89,4 млн недамінаваных рублёў, у мяне - 76 млн, у Свірскага - 49,5 млн, у Янчука - 48,4. Агульная запазычанасць перад усімі намі паводле пастановы суда- 304,271 млн з лішкам.
Пры гэтым частку заробку суд запатрабаваў выплаціць неадкладна. Але так не адбылося. Выявілася, што пакуль ішлі суды, ТАА «Аканціт» падаў на ліквідацыю прадпрыемства.
- Але нават у гэтым выпадку запазычанасці ў заробку выплачваюцца аднымі з першых. З намі павінны былі разлічыцца перш за ўсё, - тлумачаць работнікі. - Паводле закона тэрмін ліквідацыі прадпрыемства - 9 месяцаў. Мы пачакалі ўвесь гэты час, але грошай так і не атрымалі. Ніводнага паведамлення.
А прычына выявілася банальнай - яшчэ да пачатку ліквідацыйнага працэсу рахункі кампаніі арыштавала падатковая інспекцыя. І пакуль запазычанасці ў падатках не будуць выплачаныя, заробкаў работнікам не бачыць.
- Мы ведаем, што запазычанасці ў заробку трэба выплачваць раней, чым падаткі. Гэта нават у Грамадзянскім кодэксе прапісана. Напісалі зварот у падатковую інспекцыю і паказалі на гэта, - паказваюць дакументы хлопцы. - Але нам адказалі, што скасаваць сваю пастанову не могуць, бо гэта не прадугледжана заканадаўствам. З ліста вынікае, што ніякага выключэння нам зрабіць не могуць. Дзеянні падатковай інспекцыі прызнаныя правамернымі. Мы ўсе былі ў шоку. Вось праўда. Гэта значыць, нашым сем'ям можна заставацца без грошай, а развязаць пытанне з падаткамі ніяк нельга? Няўжо нельга ўвайсці ў становішча і скасаваць пастанову і выплаціць нам сумленна заробленыя грошы? Тым больш, што Грамадзянскі кодэкс мае большую юрыдычную сілу, чым астатнія нормы і інструкцыі, на якія спасылаецца падатковая інспекцыя.
Працаўнікі звярнуліся ў пракуратуру, управу Дэпартамента фінансавых расследаванняў КДК, але безвынікова. ТАА «Аканціт» грошай не выплаціла дагэтуль.
- Мы, як крэдыторы, паказвалі, што ў прадпрыемства ёсць уласнасць на 1,2 мільярда недамінаваных рублёў, на тэрыторыі прадпрыемства ёсць вышка МТС, за якую аператар плаціць арэнду. Гэтую нерухомасць можна рэалізаваць, але яе чамусьці дагэтуль не прадалі, - кажуць хлопцы. - Яшчэ ва ўласнасці кампаніі былі аўтамабілі Volkswagen Sharan 2004 года і Volkswagen LT28 1998 года. Мы іх бачылі і на іх ездзілі. Маглі б і іх прадаць, хоць частку пазыкі выплаціць. Але аўтамабілі перададзеныя на захоўванне былому дырэктару. Прадаць іх абяцалі яшчэ летась, але таксама нічога. Але калі і прададуць, то пакуль запазычанасць у падатках не выплачаная, мы сваіх грошай не ўбачым.
- Гэта нейкае замкнёнае кола. Проста два гады б'емся галавой аб нейкую непрабіўную сцяну, - эмацыйна рэзюмуюць рабочыя. - Але мы наважылі, калі нам і далей не будуць плаціць - будзем пісаць Лукашэнку. Нам больш нічога не застаецца. Мы проста так гэта не пакінем - ужо справа прынцыпу.
