Байдэн: Украіна гатовая даць адмысловы статус Данбасу
9- 24.09.2016, 11:49
- 10,370
Улады Украіны гатовыя выконваць Менскія пагадненні.
Між іншым, яны згодныя на тое, каб даць асаблівы статус тэрыторыям Данбаса, што падкантрольныя прарасейскім сепаратыстам.
Пра гэта заявіў віцэ-прэзідэнт ЗША Джозэф Байдэн, выступаючы ў Вашынгтоне ў Савеце аб міжнародных стасунках, паведамляе Украінская служба «Голасу Амерыкі».
Байдэн адзначыў, што надаванне адмысловага статусу - няпростае развязанне для Украіны, параўнаўшы гэта з гіпатэтычнай сітуацыяй, у якой ЗША далі б асаблівы статус штату Тэхас, каб улічыць інтарэсы Мексікі.
Са слоў віцэ-прэзідэнта, Расея са свайго боку не выканала ніводнага пункта Менскіх пагадненняў.
«Асаблівы статус» з'яўляецца адным з пунктаў менскіх дамоўленасцей, якія былі дасягнутыя кіраўнікамі Нямеччыны, Францыі, Украіны і Расеі для ўрэгулявання вайсковага канфлікту паміж сепаратыстамі і Кіевам.
Раней Вярхоўная рада ўзяла ў першым чытанні законапраект аб змяненні ўкраінскай канстытуцыі. У новай версіі дакумента з'явіцца закон аб спецыяльным парадку мясцовага самакіравання ў асобных раёнах Данецкай і Луганскай абласцей. У Кіеве падкрэсліваюць, што закон не будзе дзейнічаць, пакуль расейскія войскі не пакінуць усход Украіны, і сцвярджаюць, што менавіта дзеянні Расеі перашкаджаюць рэалізацыі Менскіх пагадненняў.