У Полацку навялі парадак: зраўнавалі з зямлёй градкі пенсіянераў
18- 29.09.2016, 12:42
- 15,648
У Полацку пенсіянеры пазбавіліся сваіх агародаў. Такім чынам камунальныя службы наважылі «навесці парадак».
На невялікім участку за сто метраў ад жылога дома палачане, у асноўным пенсіянеры, вырошчвалі зеляніну, гародніну і карняплоды. Але аднойчы сюды прыехала тэхніка, і праз 10 хвілін агароды ператварыліся ў роўнае поле, паведамляе АНТ.
У землеўпарадкавальнай службе запэўніваюць, што паўнамоцтваў ня перавысілі. І тлумачаць: зямля належыць не гараджанам, а камунальнай гаспадарцы горада. Са слоў чыноўнікаў, у жыхароў мікрараёна была магчымасць узаконіць свае градкі, а аб навядзенні парадку на зямлі людзей папярэджвалі яшчэ ў пачатку лета.
Адну з уладальніц агарода аргументы чыноўнікаў не задавальняюць, яна наважыла дамагацца і вяртання ўчастка, і кампенсацыі за знішчаныя саджанцы. Чыноўнікі, у сваю чаргу, настроены працягнуць барацьбу з самазахопам зямель.