Падатковая інспекцыя прадаўжае ўзмоцнена шукаць «дармаедаў»

Пакуль падатковыя органы змаглі знайсці для адпраўкі «лістоў шчасця» толькі блізу 10 тысяч адрасатаў.

Усім ім накіравалі паведамленні. Атрымальнікам лістоў ад падатковай інспекцыі трэба будзе альбо давесці, што яны працавалі ў 2015 годзе больш за 183 дні, альбо выплаціць збор да 15 лістапада 2016 года, паведамілі tut.by ў прэс-службе Міністэрства падаткаў і збораў.

Нагадаем, што яшчэ калі дакумент аб утрыманцах быў на стадыі ідэі, чыноўнікі казалі, што тых, хто не працуе і не плаціць падаткі, больш за 400 тысяч. Пакуль знайсці ўсіх не ўдалося.

Аднак колькасць плацельшчыкаў збору можа змяніцца. «Цяпер падатковымі органамі прадаўжаецца работа для фармавання базы звестак плацельшчыкаў збору на фінансаванне дзяржаўных выдаткаў за 2015 год», - кажуць у МПЗ.

Вызначэнне перыяду ўдзелу грамадзян у фінансаванні дзяржаўных расходаў, удакладняюць у падатковай інспекцыі, «вядзецца на падставе звестак, якія ёсць у дзяржаўных органах і арганізацыях».

«Аднак з прычыны таго, што многія грамадзяне працуюць за межамі нашай рэспублікі і выплачваюць падаткі на тэрыторыі замежных дзяржаў, цалкам аўтаматызаваць працэс фармавання базы звестак плацельшчыкаў з аб'ектыўных прычын не ўяўляецца магчымым», - заявілі ў МПЗ.

Пры гэтым грамадзянін, які атрымаў паведамленне на аплату збору, мае права падаць у падатковы орган дакументы і (або) тлумачэнні, якія сведчаць аб адсутнасці ў яго абавязку па выплаце збору за адпаведны падатковы перыяд ці аб няправільным вылічэнні падатковым органам сумы збору.

«Праінфармаваць аб праве на вызваленне ад выплаты збору можна як, звярнуўшыся ў падатковы орган асабіста, так і шляхам накіравання паведамлення праз размешчаны на сайце міністэрства сэрвіс «Электронны зварот», - растлумачылі спецыялісты.

Дарэчы, сёння ўжо больш за 11 тысяч грамадзян апавясцілі падатковыя органы аб праве на вызваленне ад выплаты збору.

Цяпер ад выплаты падатку на дармаедства вызваленыя шматдзетныя маці і тыя, хто выхоўвае дзяцей ва ўзросце да 7 гадоў, а таксама жанчыны, якія даглядаюць дзіця-інваліда ва ўзросце да 18 гадоў. А прысядзібны пляц пакуль што вызваляе ад выплаты падатку толькі жыхароў сельскіх населеных пунктаў і пасёлкаў гарадскога тыпу.

Нагадаем, амаль 4 тысячы беларусаў прызналіся ў дармаедстве загадзя - дзеля 10-адсоткавай скідкі на падатак. Такім людзям ужо налічылі 1 мільён 10 тысяч рублёў падатку. Самастойна беларусы маглі паведаміць падатковай інспекцыі аб тым, што нідзе не працавалі летась і не плацілі падаткі, да 31 траўня, а выплаціць збор павінны былі не пазней за 1 ліпеня.

Дэкрэтам Лукашэнкі №3 «Аб папярэджанні сацыяльнага ўтрыманства» ўстанаўліваецца абавязак грамадзян Беларусі, замежных грамадзян, якія стала пражываюць у нашай краіне, і асоб без грамадзянства, якія не ўдзельнічалі ў фінансаванні дзяржаўных расходаў або ўдзельнічалі ў такім фінансаванні менш за 183 каляндарныя дні летась, у выплаце збору сумай 20 базавых адзінак.