Двое літоўцаў везлі кланаваны Ferrari для загадкавага беларуса ў Нямеччыну

Вырабленае на замову люксавае аўто каштуе не менш за 300 тысяч еўраў.

Выраблены на замову аўтамабіль Ferrari F8 Tributo коштам не менш за 300 тысяч еўра быў знойдзены ў горадзе Сеста-Сан-Джавані пад Міланам падчас пазапланавай праверкі паліцыяй.

Люксавыя аўто дастаўлялі ў Нямеччыну для загадкавага беларуса, які купіў яго за 90 тысяч еўраў, паведамляе Corriere della Sera.

Увагу паліцыянтаў прыцягнулі двое літоўцаў, якія замацоўвалі рамянямі пунсовы Ferrari на аўтапагрузчыку. У іх праверылі дакументы. Мужчыны аказаліся работнікамі літоўскай транспартнай кампаніі, якая выконвала заказ загадкавага беларуса. Аўто трэба было адвезці ў Нямеччыну. Паводле дакументаў, аўтамабіль каштаваў 90 тысяч еўраў. Занадта нізкая цана прымусіла паліцыянтаў працягнуць расследаванне.

У дамове куплі-продажы згадвалася кампанія па абслугоўванні аўтамабіляў у Неапалі, але, падобна, па гэтым адрасе знаходзіцца турыстычнае агенцтва. Тое ж самае тычыцца таблічак са штампамі шасі, якія былі на англійскай мове, тады як у Ferrari усё напісана на італьянскай мове.

Нават дыван у машыне быў не чорным, а карычневым, абураецца італьянскі журналіст, які пераказвае паведамленне паліцыі.

Паліцыянты звязаліся з мясцовым дылерскім цэнтрам, каб параўнаць яго з аўтамабілямі матчынай кампаніі, і выявілі, што ў кампаніі ёсць ідэнтычны F8 Tributo на продаж па кошце 320 тысяч еўраў. Было праведзена тэхнічнае параўнанне дакументацыі двух аўтамабіляў, і высветлілася, што Ferrari у руках літоўцаў насамрэч быў з дакументальнага пункту гледжання клонам таго, што прысутнічаў у аўтасалоне.

Акрамя таго, пасведчанне аб рэгістрацыі было створанае на аснове бланка дакументу, знойдзенага ў 2016 годзе ў Ліворна. Такім чынам, ёсць падазрэнне, што Ferrari насамрэч з'яўляецца сагнаным аўтамабілем, які спрабавалі вывезці за мяжу з падробленымі дакументамі. Каб быць упэўненым у тым, дзе і калі аўто было выкрадзена, спатрэбіцца ўмяшанне тэхнічных спецыялістаў вытворцы, якім давядзецца прааналізаваць нумары рухавікоў.

Тым часам аўтамабіль канфіскаваны паліцыяй, а двое літоўцаў арыштаваны за атрыманне крадзенага.