Звольнены кіраўнік яшчэ аднаго беларускага тэатра

Трэці за апошні месяц.

Дырэктар Беларускага тэатра лялек Дзмітрый Сямёнаў звольнены са сваёй пасады. Аб гэтым калектыў паведаміў у сваіх сацыяльных сетках.

«Дырэктар тэатра Сямёнаў Дзмітрый Сяргеевіч прызначаны на іншую пасаду. А гэта значыць, што сёння быў яго заключны працоўны дзень», - напісалі супрацоўнікі.

Прычына звальнення не называецца.

Дзмітрый Сямёнаў узначальваў калектыў з 1 снежня 2022 года. Ён скончыў Інстытут сучасных ведаў і Беларускі педуніверсітэт імя Максіма Танка. З 2016 года з'яўляўся кіраўніком дзяржаўных устаноў на розных пасадах. Да прыходу ў тэатр з'яўляўся дырэктарам Палаца дзяцей і моладзі «Золак» Менска.

У пачатку красавіка 2024 года быў звольнены мастацкі кіраўнік віцебскага тэатра «Лялька» Віктар Клімчук. У сакавіку - дырэктар Музычнага тэатра Сяргей Пукіта.