У Беларусі расце колькасць зваротаў па тэст на бацькоўства

Паслуга карыстаецца папулярнасцю ва ўсёй краіне.

Беларусы сталі часцей звяртацца да экспэртаў па тэст на вызначэнне бацькоўства, і вынікі такой экспэртызы безумоўна прымаюцца ў якасці доваду ў судзе. Пра гэта на прэс-канферэнцыі 22 красавіка паведаміў начальнік управы Дзяржаўнага камітэта судовых экспэртыз у Менску Андрэй Рашчупкін.

Экспэрт не назваў канкрэтную колькасць ахвочых здаць тэсты на бацькоўства, але адзначыў, што яны "як трэба, так і звяртаюцца" і апошнім часам дынамічна расце.

- Гэта звязана з тым, што кожная экспэртыза, у тым ліку генетычная, мае пэўную ролю як довадная база ў судзе. Што тычыцца экспэртызы бацькоўства, то тут высновы даюцца толькі катэгарычныя – альбо так, альбо не, – патлумачыў Рашчупкін.

Ён дадаў, што паслуга карыстаецца папулярнасцю ва ўсёй Беларусі, і ва ўсіх абласных цэнтрах ёсць генетычныя аддзелы, якія праводзяць у тым ліку экспэртызу бацькоўства. У Менску ён размяшчаецца на базе цэнтральнага апарата Дзяржкамітэта судовых экспэртыз.

Паводле слоў Андрэя Рашчупкіна, вынік экспэртызы на бацькоўства "ў судзе мае вагу абавязковую і беспярэчную".

- Дынаміка толькі станоўчая. Становіцца ўсё больш [зваротаў], - распавёў экспэрт.

У якасці прыкладу такой экспэртызы, якая значна змяніла жыццё сям'і, Рашчупкін расказаў аб выпадку мужчыны, які выхоўваў траіх дзяцей, а потым высветлілася, што ўсе яны не ад яго.

- Прывяла яго [на даследаванне] ягоная ж мама, - дадаў ён.