Зорка Галівуду Шон Пэн расказаў, што зрабіў бы з Пуціным пры асабістай сустрэчы

Вядомы актор падтрымаў Украіну.

Легендарны амерыканскі актор, кінарэжысёр і прадусар Шон Джасцін Пэн (Sean Justin Penn), уладальнік "Оскара" за галоўныя ролі ў фільмах «Таямнічая рака» і «Харві Мілк», чарговым разам выказаў падтрымку ўкраінцам, якія змагаюцца з агрэсіяй Крамля, а таксама, што пры сустрэчы з расейскім прэзідэнтам-узурпатарам Уладзімірам Пуціным ударыў бы яго, інфармуе BILD.

Варта адзначыць, што ў мінулыя выходныя на нямецкім ТВ прайшла прэм'ера дакументальнай кінастужкі Шона Пэна аб вайне ва Украіне.

Характэрна, што ў гэтым фільме расказваецца, як у 2001 годзе на кінафестывалі ў Маскве сам Пэн і яшчэ адзін вядомы актор Джэк Нікалсан асабіста сустракаліся з Пуціным. Тады яшчэ расейскі новаспечаны прэзідэнт не выяўляў дыктатарскіх замашак у такой ступені, таму тая сустрэча прайшла ў дастаткова цёплай атмасфера. Але вось цяпер стаўленне Пэна да Пуціна памянялася на дыяметральна супрацьлеглае, паколькі ён убачыў, што вычварае былы «чэкіст», які дарваўся да ўлады.

На пытанне, што б актор зрабіў цяпер пры сустрэчы з прэзідэнтам РФ, Шон Пэн адназначна адказаў: «Ударыў!»

Таксама ён раскрытыкаваў палітыку ЗША ў дачыненні да расейскай агрэсіі, папракнуўшы свае ўлады ў тым, што тым не стае сілы волі.

«На жаль, я бачу, што майму ўраду сёння не стае волі, лідарства і ахвярнасці, якія былі ў прэзідэнта Рузвельта ў Другой сусветнай вайне", - адзначыў ён.

Пэн таксама дадаў, што верыць у стойкасць украінцаў, якія змагаюцца за сваю зямлю.

«Вось чаму мы не павінны дапусціць паразы ў гэтай вайне, незалежна ад таго, дэмакраты ці рэспубліканцы ва ўладзе. Калі мы саступім у гэтай вайне, гэта можа стаць і канцом Злучаных Штатаў», - рэзюмаваў ён.