Расейскія нафтавікі не змаглі перапусціць дзве траціны пацярпелых ад дронаў НПЗ

Гэта прывяло да падзення вытворчасці бензіну і дызельнага паліва.

Расейскім нафтавікам пакуль удалося аднавіць толькі траціну магутнасцяў нафтаперапрацоўчых заводаў, якія пацярпелі ад удараў украінскіх дронаў у студзені, лютым і сакавіку, паведамляе Reuters са спасылкай на знаёмыя з сітуацыяй крыніцы і галіновую статыстыку.

На падлікі агенцтва, на сярэдзіну красавіка ў рэжыме аварыйнага прастою праз вонкавыя ўздзеянні па-ранейшаму знаходзіліся ўстаноўкі перапрацоўкі нафты магутнасцю 90,5 тысячы тон за дзень — ці 9,9% ад сукупнай магутнасці расейскіх НПЗ. У апошні тыдзень сакавіка сумарная прадукцыйнасць аварыйна спыненых першасных установак дасягала 123800 тон на дзень, або 13,6% ад агульнай магутнасці.

Са слоў крыніц Reuters, у красавіку былі скончаныя рамонтныя працы на найбуйнейшым НПЗ «Раснафта» ў Разані. Завод, які забяспечвае палівам у тым ліку Маскву і сталічны рэгіён, патрапіў пад удар БПЛА 13 сакавіка і быў змушаны спыніць працу абедзвюх установак першаснай перапрацоўкі.

Таксама нафтавікам удалося аднавіць працу Куйбыўшаўскага НПЗ, які трапіў пад налёт дронаў 23 сакавіка. На Сызранскім НПЗ «Раснафта», які быў атакаваны 16 сакавіка, перапусціць пацярпелую ад дрона вытворчасць пакуль не ўдалося. Замест яе на заводзе запусцілі другую ўстаноўку першаснай перапрацоўкі, якая знаходзілася ў тэхнічным прастоі ў момант налёту БПЛА. Поўны рамонт завода зацягнецца да чэрвеня, гавораць крыніцы Reuters.

Іншыя заводы, якія трапілі пад удары дронаў, дагэтуль не развязалі тэхнічных праблем. Туапсінскі НПЗ «Раснафта», адзіны на чарнаморскім узбярэжжы Расеі, працягвае «стаяць» пасля атакі, якая адбылася яшчэ ў канцы студзеня. «Ніжагароднафтааргсінтэз» «Лукойла», дзе з сярэдзіны сакавіка спыненая найбуйнейшая ўстаноўка першаснай перапрацоўкі, працягне рамонт да траўня, кажуць крыніцы Reuters. З іх слоў, фактычная загрузка першасных установак, якія вярнуліся ў работу пасля аварый, у шэрагу выпадкаў ніжэйшая за намінальную, але ў асноўным знаходзіцца на дааварыйным узроўні.

На падлікі Reuters, за студзень-сакавік не менш за 10 заводаў пацярпелі ад дронаў. У выніку, паводле звестак Расстата, з пачатку сакавіка да 7 красавіка вытворчасць бензіну ў Расеі абрынулася на 10,1%, а дызельнага паліва – на 7,6%.