Лукашэнка прызначыў Шэймана адказным за арабскі кірунак
5
15:13, — Палітыка
Аляксандр Лукашэнка лічыць магчымым рэалізацыю сумесных праектаў з Аб'яднанымі Арабскімі Эміратамі ў самых розных сферах, уключна нафту, хімію, энергетыку і ваенна-тэхнічнае супрацоўніцтва.
"Улічваючы невысокі ўзровень таваразвароту, мы раней дамовіліся аб супрацоўніцтве ў такіх галінах як нафта і хімія, энергетыка, ваенна-тэхнічнае супрацоўніцтва, касмічныя тэхналогіі, будаўніцтва, транспарт, прамысловасць, спорт і турызм. Я буду задаволены, калі падчас вашага візіту мы выпрацуем пэўныя праграмы па гэтых кірунках", заявіў А.Лукашэнка, сустракаючыся ў Менску з старшынёй Выканаўчага апарата ўрада Эмірата Абу-Дабі Хальдунам Хаіфай Аль Мубаракам.
Кіраўнік дзяржавы нагадаў, што падчас яго візіту ў ААЭ было прынятае рашэнне аб стварэнні сумеснай міжурадавай камісіі "з высокімі паўнамоцтвам, якая вызначыць пэўны кірунак супрацоўніцтва". З беларускага боку сустаршынёй гэтай камісіі прызначаны Дзяржаўны сакратар Савета бяспекі Віктар Шэйман, а з боку ААЭ – кіраўнік Выканаўчага апарата ўрада Эмірата Абу-Дабі Х.Аль Мубарак.
"Прыйшоўшы ў Заліў, мы выразна вызначылі нашага саюзніка і партнёра. Гэтым партнёрам сталі Аб'яднаныя Арабскія Эміраты", – сказаў А.Лукашэнка. Паводле яго слоў, "усё, што было заяўленае беларускім бокам, будзе, безумоўна, выкананае". "Мы можам сёння прапанаваць сотні варыянтаў нашага супрацоўніцтва", – заявіў кіраўнік беларускай дзяржавы.
Паводле яго слоў, "самае галоўнае, што вы прыехалі ў Беларусь, і маеце магчымасць убачыць усё на свае вочы, зрабіць пэўныя высновы". "Калі вы гатовыя да супрацоўніцтва, то мы гатовыя зрабіць масу крокаў у кірунку гэтага супрацоўніцтва", – адзначыў А.Лукашэнка, падкрэсліўшы, што беларускі бок гатовы да наладжвання "стратэгічнага ўзроўню партнёрства".
