Супраць Анатоля Лябедзькі адноўленае расследаванне

1 жніўня ў дачыненні да лідэра АГП Анатоля Лябедзькі адноўленае расследаванне па крымінальнай справе «19 снежня».

Палітык называе гэтае рашэнне «палітычным, а не прававым», паведамляе ucpb.org.

Начальнік следчага ўпраўлення папярэдняга расследавання Г. Казакевіч паведаміў Анатолю Лябедзьку, што «папярэдняе расследаванне па крымінальнай справе N 10011110362 адноўленае першага жніўня 2011 года. Аб прынятым працэсуальным рашэнні Вы будзеце апавешчаныя дадаткова».

Міліцэйскі чыноўнік адрэагаваў і на невяртанне палітыку пашпарта і асабістых рэчаў. «Паўторна інфармую, што копія Вашага звароту ад 10.06.2011 накіраваная для разгляду ў КДБ Рэспублікі Беларусь у частцы вяртання пашпарту і асабістых рэчаў», - напісаў Г. Казакевіч.

«На жаль, з адказу Казакевіча не зразумелыя матывы і прычыны аднаўлення расследавання. Гэта дае падставы меркаваць, што падаплёка палітычная, а не прававая. Сілавыя структуры рыхтуюцца да восені, і даюць зразумець, што гатовыя заводзіць ў адкрытую справу новых фігурантаў. Для мяне гэта значыць, што я буду заставацца ў статусе палітычнага закладніка нявызначаны час.

Што тычыцца пашпарта і асабістых рэчаў, то тут МУС адкрыта тыкае пальцам у КДБ, які робяць дурня і атрымліваюць асалоду ад сваёй маленькай поскудзі. Я не магу не толькі абмяняць пасведчанне кіроўцы, але нават атрымаць паштовую карэспандэнцыю. Але гэта і ёсць ўзровень інтэлектуальнага развіцця нашых спецслужбаў», - пракаментаваў развіццё сітуацыі Анатоль Лябедзька.

Палітык заяўляе, што ўсе «прававыя магчымасці вырашэння пытання вычарпаныя. Я маю намер зачахліць асадку і больш не марнаваць час на паператворчасць. Звяртацца да нашых праваахоўных органаў у маім выпадку ўсё роўна, што да тэлеграфнага слупа».

На прэзідэнцкіх выбарах 2010 года Лябедзька працаваў у камандзе кандыдата ад АГП - свайго намесніка Яраслава Раманчука. Пасля акцыі пратэсту 19 снежня ў ноч на 20 снежня затрыманы сіламі дзяржбяспекі ў сябе дома. Змешчаны ў СІЗА КДБ. Абвінавачаны ў арганізацыі масавых беспарадкаў. Прызнаны «Міжнароднай амністыяй» вязнем сумлення. Дома яго чакалі жонка і сын. Позна ўвечары 6 сакавіка вызвалены пад падпіску аб нявыездзе.