Замежную прэсу забароняць канчаткова

Прадукцыя замежнага СМІ, якая распаўсюджваецца на тэрыторыі Беларусі, можа быць распаўсюджаная толькі пасля атрымання дазволу ў Міністэрстве інфармацыі.

Пра гэта БелТА паведамілі ў міністэрстве, каментуючы парадак распаўсюджвання замежных газет і часопісаў у Беларусі.

Як патлумачылі ў ведамстве, парадак выдачы дазволу на распаўсюд прадукцыі замежных СМІ рэгулюецца адпаведным палажэннем, зацверджаным пастановай Савета Міністраў Беларусі ад 2 снежня 2008 года № 1849.

У выпадку невыканання патрабаванняў заканадаўства аб сродках масавай інфармацыі, якія выявіліся ў незаконным вырабе і распаўсюдзе прадукцыі СМІ, парушальнік можа быць прыцягнуты да адказнасці на падставе часткі 2 артыкула 22.9 Кодэкса Беларусі аб адміністрацыйных правапарушэннях.

«Пра гэта праінфармаванае ПУП «Белінфацэнтр», якое займаецца распаўсюдам замежных газет і часопісаў», - адзначылі ў Міністэрстве інфармацыі.