КДБ затрымаў каардынатара МММ-2011 у Беларусі

За незаконную прадпрымальніцкую дзейнасць і ажыццяўленне незаконных фінансавых аперацый затрыманы каардынатар МММ-2011.

Пра гэта 19 кастрычніка паведаміў сайт Камітэта дзяржбяспекі Беларусі.

«У рамках работы па забеспячэнні эканамічнай бяспекі дзяржавы і спыненні злачынстваў, накіраваных на ўшчамленне законных праў і інтарэсаў грамадзян Рэспублікі Беларусь Камітэтам дзяржаўнай бяспекі затрыманы адзін з каардынатараў фінансавай піраміды «МММ-2011», які хаваўся ад крымінальнага пераследу», - гаворыцца ў паведамленні.

Затрыманаму прад'яўленае абвінавачванне ў здзяйсненні злачынства, прадугледжанага ч. 3 арт. 233 «Незаконная прадпрымальніцкая дзейнасць» КК Рэспублікі Беларусь.

Устаноўлена таксама дачыненне затрыманага да ажыццяўлення незаконных фінансавых аперацый і завалодання грашовымі сродкамі беларускіх грамадзян шляхам падману.

Як сцвярджаецца ў паведамленні, каардынатар фінансавай піраміды і іншыя асобы, дзейнічаючы ад імя незарэгістраванай у падатковых органах і органах мясцовай выканаўчай улады арганізацыі «МММ-2011» ажыццяўлялі на тэрыторыі Рэспублікі Беларусь дзейнасць па прыёме ўкладаў і ставак на выйгрыш ад насельніцтва. Выплата адсоткаў па ўкладах альбо вяртанне ўкладзеных грашовых сродкаў з улікам абумоўленага ўзнагароджання (выйгрышу) ажыццяўлялася членамі групы за кошт прыцягнення новых укладаў (ставак) грамадзян, якіх наўмысна ўводзілі ў зман адносна законнасці і эканамічнай мэтазгоднасці здзяйснення падобных аперацый.

У выніку незаконнай дзейнасці кампаніі «МММ-2011» у фінансавыя махінацыі аказаліся ўцягнутымі некалькі тысяч грамадзян Беларусі. Цікава, што асноўны кантынгент удзельнікаў «фінансавай піраміды» склалі маладыя людзі 1985-1990 гадоў нараджэння, не знаёмыя з дзейнасцю «МММ» пачатку 90-х і яе негатыўнымі наступствамі для мільёнаў грамадзян.