Анатоль Лябедзька: Улады помсцяць за байкот «выбараў»

Ад «грузінскіх мільёнаў» аддае пахам пацукоў з падвала КДБ, адзначыў палітык.

«Гэтая гісторыя пачалася яшчэ ў 2006 годзе. Тады перад «Чарнобыльскім шляхам» мяне выкралі. Пасадзілі ў машыну, нацягнулі на галаву куртку і вазілі па горадзе. Потым мяне прывезлі ў нейкі падвал, дзе паспрабавалі ўчыніць допыт, у тым ліку і пра гэты фільм французскіх журналістаў», - распавёў сайту charter97.org старшыня Аб'яднанай грамадзянскай партыі (АГП) Анатоль Лябедзька.

Па словах палітыка, акрамя гэтага відэароліка ва ўлад на яго нічога няма. «Другі раз мне дэманстравалі гэты відэазапіс у СІЗА КДБ пасля прэзідэнцкіх «выбараў» 2010 года. У іх не было нічога, што мне прад'явіць, і таму яны зноў паказвалі гэты матэрыял французскіх журналістаў».

Але і ў самым відэароліку нічога крамольнага няма, упэўнены Анатоль Лябедзька: «Калі б там была хоць якая-небудзь зачэпка - я б цяпер не хадзіў на волі. Ад гэтага відэароліка аддае пахам пацукоў з падвала КДБ».

Палітыку помсцяць за кампанію «За сумленныя выбары без Лукашэнкі» і за байкот выбараў, лічыць сам Анатоль Лябедзька. «Я не выключаю, што мяне будуць таксама цкаваць, як Сяргея Удальцова ў Расеі. У нас можа здарыцца ўсё што заўгодна. Я разумею, ва ўлад ёсць жаданне адпомсціць за байкот «выбараў» і за кампанію «За сумленныя выбары без Лукашэнкі». У іх ёсць намер і планы паралізаваць мяне часткова або цалкам. Але іх абвінавачванні пакуль не выклікаюць нічога, акрамя ўсмешкі і паціскання плячыма».

Старшыня АГП патрабуе, каб камітэтчыкі вярнулі грошы, якія яны скралі ў палітыка. «У мяне ёсць сустрэчнае пытанне да КДБ. Хай яны вернуць грошы, скрадзеныя імі ў мяне пасля прэзідэнцкіх «выбараў» 2010 года. Ёсць рашэнне суда аб закрыцці крымінальнай справы супраць мяне і аб тым, што мне павінны быць вернутыя ўсе канфіскаваныя рэчы і грошы. Мне да гэтага часу іх не вярнулі. Прычым не грузінскія «мільёны», а мае асабістыя сродкі. Гэта сур'ёзнае абвінавачванне КДБ у крадзяжы маіх грошай».

Анатоль Лябедзька чакае рэакцыі КДБ на заяву Лукашэнкі аб дачы таму хабару: «Калі КДБ рэагуе на ўсе паведамленні ў СМІ, то чаму яны не адрэагуюць на заяву Лукашэнкі аб дачы яму хабару? Гаворка ідзе нават не пра мільёны, а пра мільярды даляраў. Гэта было выразна і адназначна агучана Лукашэнкам на апошняй прэс-канферэнцыі. Няхай КДБ адрэагуе на гэтую заяву кіраўніка аб хабары, як і на яго прызнанне аб атрыманні «Майбаха». Будзьце ласкавы».

У Беларусі тэстуюць рэпрэсіўныя механізмы, якія потым выкарыстоўваюцца ў Расеі, адзначыў палітык. «Калі ў свой час мы казалі, што Беларусь - эксперыментальная лабараторыя для апрабавання рэпрэсіўных тэхналогій, якія потым будуць выкарыстоўвацца на постсавецкай прасторы, у Расеі паціскалі плячыма і казалі, што гэта не для іх. Як аказалася, менавіта для іх».

Нагадаем, у прапагандысцкай праграме «Анатомія пратэсту», якая выйшла на тэлеканале НТВ, тэлебачанне абвінаваціла аднаго з лідэраў расейскай апазіцыі Сяргея Удальцова ў падрыхтоўцы «масавых беспарадкаў». Таксама тэлеканал заявіў, што цяперашні кіраўнік Савета бяспекі Грузіі Гіга Бакерія даваў грошы Удальцову на падрыхтоўку гэтых «беспарадкаў».

Пасля гэтага ў эфіры іншага расейскага тэлеканала РТР паказалі перадачу аб сустрэчы Анатоля Лябедзькі з тым жа Гіга Бакеріем, якая нібыта праходзіла ў 2005 годзе. Па заяве тэлеканала, Анатоль Лябедзька нібыта атрымаў ад грузінскага парламентарыя 4 мільёны даляраў на рэвалюцыю ў Беларусі. КДБ заявіла, што зоймецца праверкай гэтай заявы РТР.