Спецназ разагнаў мастацкую акцыю з кубікамі (Фота)
48- 9.10.2012, 16:35
Былі затрыманыя мастак Міхаіл Гулін, трое валанцёраў і журналістка «Нашай Нівы».
Актывісты праводзілі акцыю «Складанасці выразу ў грамадскай прасторы».
Затрыманыя знаходзяцца ў Цэнтральным РУУС Менска. У 16:30 журналістку Таццяну Гаўрыльчык адпусцілі, астатніх пакінулі ў пастарунку.
Як паведаміла «Радыё Свабода» Таццяна Гаўрыльчык, у міліцыі Цэнтральнага раёна на ўсіх складаюць пратаколы аб адміністрацыйным правапарушэнні, верагодна, з нагоды дробнага хуліганства. «Прайшло тры гадзіны пасля затрымання, але пратакол яшчэ не паказвалі», - паведаміла Таццяна.
«Гэта была абсалютна апалітычная акцыя, гэта быў мастацкі перформанс. Валанцёры складалі рознакаляровыя кубікі і пірамідкі. Калі на плошчы Незалежнасці ўсё прайшло мірна, да нас толькі падышлі міліцыянты, спыталі, што гэта такое, і ніяк не перашкаджалі пасля тлумачэнняў, то на Кастрычніцкай плошчы адразу прыехаў аўтобус са спецназам, усіх забралі і адвезлі ў РУУС», - распавяла Таццяна Гаўрыльчык.
Як расказаў Міхаіл Гулін, спачатку міліцыя паводзіла сябе даволі мірна. Аднак калі затрыманыя адмовіліся здаваць адбіткі пальцаў, супрацоўнікі міліцыі ўжылі сілу.
Канфіскаваны ў мастакоў рэквізіт. Цэнтральны РУУС
Фота Таццяны Гаўрыльчык